ესტონეთის თავდაცვის ძალების შტაბის უფროსის მოადგილის, ვიცე-პოლკოვნიკ მატიას პუუსეპის თქმით, მიუხედავად იმისა, რომ გასული კვირის განმავლობაში რუსეთ-უკრაინის ფრონტის მთელ ხაზზე აქტიური საომარი მოქმედებები გაგრძელდა, სერიოზულ წარმატებას ვერც ერთმა მხარემ ვერ მიაღწია. 6 დეკემბერს ესტონეთის თავდაცვის სამინისტროში გამართულ პრესკონფერენციაზე მან ასევე ხაზგასმით აღნიშნა, რომ კურსკის ოლქში შეჭრილი უკრაინელები რუსების მხრიდან მუდმივი ზეწოლის ქვეშ რჩებიან.
მატიას პუუსეპი ამბობს, რომ ზოგიერთ რაიონში ამინდის გაუარესების გამო, მძიმე ტექნიკის გადაადგილება უფრო რთული გახდა. „ამიტომ, რუსეთის ფედერაციის შეიარაღებული ძალები თავიანთი ქვედანაყოფების ფრონტზე გადასაყვანად ხშირად კვადროციკლებს და მოტოციკლებს იყენებენ, რომლებიც ჯარების დაცვას და მათი საბრძოლო უნარების სათანადოდ გამოვლენას ვერ უზრუნველყოფენ, თუმცა, სამაგიეროდ, გართულდა მათი აღმოჩენა, ისინი უფრო სწრაფად გადაადგილდებიან და უკეთესი შეღწევადობის უნარი გააჩნიათ“, – განაცხადა მან.
„უკრაინის შეიარაღებული ძალები კურსკის ოლქში რუსეთის ფედერაციის ძალების მხრიდან მუდმივი ზეწოლის ქვეშ იმყოფებიან. მიუხედავად იმისა, რომ ბოლო კვირების განმავლობაში, რუსეთის ჯარმა წინ წაიწია, არსებითი პროგრესისთვის არცერთ მხარეს არ მიუღწევია“, -აღნიშნა ესტონეთის თავდაცვის ძალების ვიცე-პოლკოვნიკმა.
მატიას პუუსეპი შენიშნავს, რომ უკრაინული ძალების მანევრირების შეზღუდვის მიზნით, რუსულმა ჯარებმა ქალაქ კუპიანსკის ჩრდილოეთით, ლუგანსკის და ხარკოვის ოლქების საზღვართან, მდინარე ოსკილი გაამაგრეს, რითაც ისინი მდინარის დასავლეთ ნაპირზე პლაცდარმის შექმნას ცდილობენ.
„ამ დროისთვის უკრაინულმა ძალებმა მოახერხეს ერთ-ერთი პლაცდარმის ლიკვიდაცია, მეორე კი, სავარაუდოდ, უახლოეს დღეებში გადაილახება. ერთი ან მეტი პლაცდარმის შექმნა რუსეთის ფედერაციის ძალებს შესაძლებლობას მისცემს, ქალაქ კუპიანსკს დაემუქრონ არა მხოლოდ აღმოსავლეთიდან, არამედ ჩრდილოეთიდანაც“, – აღნიშნა ვიცე-პოლკოვნიკმა ესტონეთის თავდაცვის სამინისტროში გამართულ პრესკონფერენციაზე.
„სავარაუდოა, რომ უახლოეს მომავალში რუსეთის ფედერაცია შეეცდება, შექმნას დამატებითი პლაცდარმები, მაგალითად, ფრონტის სამხრეთ სექტორში, მდინარე დნეპრის მიდამოებში. ფრონტის ეს უბანი უკრაინელებს კარგად აქვთ გამაგრებული, მაგრამ თუ რუსეთის მიზანი უკრაინის შეიარაღებული ძალებისთვის ხელ-ფეხის შეკვრა და შეტევის მხარდაჭერის თავიდან აცილებაა, მაშინ მათი მხრიდან ასეთი ნაბიჯის გადადგმა საკმაოდ სავარაუდოა“, – ვარაუდობს მატიას პუუსეპი.
მისივე თქმით, ასევე დიდია რუსული ჯარების ზეწოლა დონეცკის ოლქში.
„რუსული ძალები კონცენტრირებულია ქალაქ კურახოვოს მახლობლად, პოკროვსკიდან სამხრეთით დაახლოებით 30 კილომეტრში, საიდანაც ისინი შეტევის ორი მიმართულების გააერთიანებას ცდილობენ. ერთია აღმოსავლეთ-დასავლეთის მიმართულება №15 ავტომაგისტრალის გასწვრივ, ხოლო მეორე – ჩრდილოეთ- ვუხლედარის რაიონის ხაზი იმავე გზატკეცილის გასწვრივ“, – აღნიშნა ესტონელმა ვიცე-პოლკოვნიკმა.
„საკმაოდ რთული ვითარება შეიქმნა, რადგან რუსების შეტევის ამ ორი მიმართულების გაერთიანებამ შეიძლება უკრაინული ძალების ალყაში მოქცევა გამოიწვიოს. თუმცა, ეს რაიონი, სავარაუდოდ, უკრაინის მხრიდან მხარდაჭერის გარეშე არ დარჩება და რადგან ალყის საშიშროება არსებობს, ალბათ, შესაბამისი შემარბილებელი ზომები იქნება მიღებული“.