ყველამ დაინახა, რომ ხელისუფლების გადატრიალების მცდელობა შეუძლებელია, ასეთი რამ ვერ განხორციელდება და ახლა ახალ მეთოდზე გადავიდნენ, ბულინგმა უფრო მასშტაბური ხასიათი მიიღო, – ამის შესახებ პარლამენტის იურიდიულ საკითხთა კომიტეტის თავმჯდომარემ, გიორგი კახიანმა საქართველოს პირველ არხს განუცხადა.
კახიანის თქმით, ბულინგი ამორალური, მიუღებელია და მას არანაირი შედეგი არ ექნება.
„მძიმე საყურებელია, როცა რადიკალური მედიის წარმომადგენლები ცდილობენ, სხვა მედიის წარმომადგენლები დააბულინგონ. ყველამ დაინახა, რომ ხელისუფლების გადატრიალების მცდელობა შეუძლებელია და ასეთი რამ ვერ განხორციელდება, ახლა ახალ მეთოდზე გადავიდნენ და ბულინგმა უფრო მასშტაბური ხასიათი მიიღო. რა თქმა უნდა, ეს მიუღებელია და არც არაფრის მომტანია, რადგან საზოგადოებაში ვინმე ასეთ ბულინგს არ დაექვემდებარება, მით უმეტეს, როცა თავისუფალი მედიის წარმომადგენლებზეა საუბარი. არაფერს ვიტყვი იმაზე, რომ ამას იმ მედიის წარმომადგენლები აკეთებენ, რომლებიც ისეთი პოლიტიკური ძალების სამსახურში არიან, რომელთა ხელისუფლებაში ყოფნის პერიოდში, გვახსოვს, როგორ ხდებოდა ადამიანის უფლებების დარღვევა, როგორი დამოკიდებულება იყო მედიის თავისუფლების მიმართ და ასე შემდეგ. ბულინგი ამორალური და მიუღებელია, რასაც არანაირი შედეგი არ ექნება“, – განაცხადა გიორგი კახიანმა.