კვირას, 8 დეკემბერს მეამბოხეების სწრაფი წინსვლის და მათ მიერ სირიის დედაქალაქ დამასკოზე კონტროლის დაწესების შემდეგ, ხალხი აწ უკვე ყოფილი პრეზიდენტის, ბაშარ ასადის სასახლიდან ავეჯს და ხელოვნების ნიმუშებს ეზიდება.
რუსეთის საგარეო საქმეთა სამინისტრომ დაადასტურა, რომ ბაშარ ასადმა ქვეყანა დატოვა და ძალაუფლების მშვიდობიანად გადაცემას დაუჭირა მხარი.
„ბაშარ ასადსა და სირიის არაბთა რესპუბლიკის ტერიტორიაზე შეიარაღებული კონფლიქტის მონაწილე რამდენიმე მხარეს შორის მოლაპარაკების შედეგად, მან პრეზიდენტის პოსტიდან გადადგომა და ქვეყნის დატოვება გადაწყვიტა, ამასთან, ძალაუფლების მშვიდობიანი გზით გადაცემის განკარგულება გასცა“, – ნათქვამია განცხადებაში.
„რუსეთს ამ მოლაპარაკებებში მონაწილეობა არ მიუღია“, – აღნიშნა რუსეთის საგარეო საქმეთა სამინისტრომ.
მედიის ცნობით, დამასკოში შესვლამდე რამდენიმე საათით ადრე, აჯანყებულებმა გამოაცხადეს, რომ აიღეს ქალაქი ჰომსი, სადაც ადგილობრივი მოსახლეობა ამ მოვლენის აღსანიშნავად ქუჩებში გამოვიდა.
უფრო ადრე, ხუთშაბათს, 5 დეკემბერს ისლამისტურმა დაჯგუფება „ჰაიათ თაჰრირ ალ-შამმა“ სირიის სიდიდით მეორე და მეოთხე ქალაქები, ალეპო და ჰამი დაიკავა.
აღსანიშნავია, რომ ამ დაჯგუფების მებრძოლები ალეპოში პირველად შევიდნენ მას შემდეგ, რაც ის რვა წლის წინ ბაშარ ასადის ერთგულმა ჯარებმა დაიპყრეს.