ჟურნალისტების მიმართ ძალადობა გაურკვეველი პირების მხრიდან მოხდა და იმედი მაქვს, საზოგადოება გამოძიებით გაიგებს, ვინ ჩაიდინა ეს ამაზრზენი ქმედება, – ამის შესახებ საპარლამენტო უმრავლესობის წევრმა, დავით მათიკაშვილმა საქართველოს პირველ არხს განუცხადა.
მათიკაშვილი „ტვ პირველის“ გადამღებ ჯგუფზე პირდაპირ ეთერში თავდასხმას გამოეხმაურა.
„სრულიად დაუშვებელი და მიუღებელია ძალადობა, რაც ვიხილეთ როგორც ჟურნალისტების, ასევე სამართალდამცავების მიმართ. იყო ფიზიკური და ვერბალური ძალადობა. ეს ფაქტიც განსაკუთრებული ძალადობით იყო დატვირთული. ეს არის წარმოუდგენელი ძალადობა, მაგრამ, სამწუხაროდ, ძალადობა ძალადობას შობს. ყველამ თავი უნდა შეიკავოს მშვიდობიანი ეტაპიდან ძალადობრივ რეჟიმში გადასვლაზე. ჟურნალისტების მიმართ ძალადობა გაურკვეველი პირების მხრიდან მოხდა და იმედი მაქვს, საზოგადოება გამოძიებით გაიგებს, ვინ ჩაიდინა ეს ამაზრზენი ქმედება“, – განაცხადა დავით მათიკაშვილმა.