„2025 წელსაც გრძელდება მაღალი ეკონომიკური ზრდა, რასაც გადამწყვეტი მნიშვნელობა აქვს ქვეყნის განვითარებისთვის, ორნიშნა ეკონომიკურ ზრდას კი განაპირობებს სწორი გადაწყვეტილებები, ჩვენი ქვეყნის ინტერესების დაცვა და მშვიდობა, რაც უნდა გაგრძელდეს“, – განაცხადა პარლამენტის საფინანსო-საბიუჯეტო კომიტეტის თავმჯდომარე პაატა კვიჟინაძემ პარლამენტის სხდომაზე, სადაც 2025 წლის სახელმწიფო ბიუჯეტის პროექტი განიხილეს.
კომიტეტის თავმჯდომარემ პარლამენტის ტრიბუნიდან აუხსნა ოპონენტებს, თუ რატომ არის ქვეყანაში ორნიშნა ეკონომიკური ზრდა რეალური. ამის დასტურად პაატა კვიჟინაძემ „საქსტატის“ და საერთაშორისო სავალუტო ფონდის მონაცემები მოიყვანა.
„ვისაც არ სჯერა და არ ენდობა სტატისტიკის მაჩვენებლებს, მინდა გითხრათ, რომ ყველაზე ავტორიტეტული ორგანიზაციის, საერთაშორისო სავალუტო ფონდის ოქტომბერში განახლებული პროგნოზებით, ერთ სულ მოსახლეზე რეალური მშპ-ს ზრდის ტემპით 2030 წლისათვის, მსოფლიოში საქართველო მეორე ადგილზე იქნება, ხოლო 2024 წელს საქართველოს აქვს ერთ-ერთი ყველაზე მაღალი ეკონომიკური ზრდის ტემპი მსოფლიოში. ოპოზიცია გვეუბნება, რომ ეკონომიკა არ იზრდება 10%-ით და ლარის კურსთან დაკავშირებითაც აპოკალიფსურ სურათს ხატავენ. ამ პროცესში ზოგიერთი დიპლომატიც ჩაერთო. ერთმა ელჩმა განაცხადა – ეკონომიკური ზრდა ომმა გამოიწვია და მალე დამთავრდებაო, მინდა მას ტრიბუნიდან ზრდილობიანად ვუპასუხო: ჯერ ერთი, ის ომი ჩვენ ხომ არ დაგვიწყია, რუსეთი დაესხა თავს უკრაინას, სამწუხარო ამბავი მოხდა. და მეორე: რატომ მოლდოვაში არ გაიზარდა? ბელარუსში? შუა აზიაში? ჩვენს გვერდით მეზობლებში? იქ ხომ არ არის ომი? რაღა მაინცდამაინც საქართველოში გაიზარდა? თუნდაც ამით იყოს გამოწვეული, ესე იგი, საქართველოში მთავრობას შეუქმნია ის პირობები, რომ დოვლათი აქ შემოვიდა“, – განაცხადა კომიტეტის თავმჯდომარემ და ეროვნულ ვალუტაზეც ისაუბრა.
მისი თქმით, ჯერ მაისის ცნობილი მოვლენების შემდეგ იყო ლარის კურსზე ზეწოლა, და ეროვნული ბანკის მხრიდან მოხდა შესაბამისი რეაგირება, ხოლო შემდგომ არჩევნების პერიოდში.
რაც შეეხება უშუალოდ ბიუჯეტის მაჩვენებლებს, 2024 წლის მსგავსად, როგორც კომიტეტის თავმჯდომარემ აღნიშნა, 2025 წელსაც გვაქვს მაღალი ეკონომიკური ზრდა. ბიუჯეტის ყველა მაკრო-ფისკალური მაჩვენებლები ევროპული და ქართული კანონმდებლობით დადგენილ საუკეთესო პრაქტიკით განსაზღვრულ დონეზეა.