აშშ-ის არჩეულმა პრეზიდენტმა დონალდ ტრამპმა გააფრთხილა ევროკავშირი, რომ ამერიკული ნავთობი და გაზი დიდი რაოდენობით იყიდონ, წინააღმდეგ შემთხვევაში მათ გაზრდილი ტარიფებით დაემუქრა. ინფორმაციას The Financial Times-ი ავრცელებს.
„მე ევროკავშირს ვუთხარი, რომ მათ უზარმაზარი დეფიციტი შეერთებული შტატების ნავთობისა და გაზის დიდი რაოდენობის შესყიდვით უნდა აღმოფხვრან. წინააღმდეგ შემთხვევაში, ტარიფები გზაშია“, – ციტირებს გამოცემა ტრამპს, რომელმაც ამის შესახებ მის სოციალურ ქსელში დაწერა.
ტრამპმა ეს განცხადება მას შემდეგ გააკეთა, რაც ბრიუსელში თქვეს, რომ ევროკავშირი ამერიკისგან თხევადი გაზის უფრო მეტი მოცულობით შესყიდვას გეგმავს, რაც ამ ორგანიზაციისთვის მაშველ რგოლად იქცა მას შემდეგ, რაც რუსეთმა საკუთარი წიაღისეულის ექსპორტი შეამცირა.
როგორც გამოცემა აღნიშნავს, ევროკომისიის პრეზიდენტმა ურსულა ფონ დერ ლაიენმა ჯერ კიდევ ნოემბერში განაცხადა, რომ ევროკავშირი ამერიკისგან დიდი მოცულობის გაზის შესყიდვის შესაძლებლობას განიხილავს.
„ჩვენ ჯერ კიდევ ვიღებთ რუსულ თხევად გაზს დიდი რაოდენობით, და რატომაც არ ჩაგვენაცვლა ის ამერიკული თხევადი გაზით, რომელიც ჩვენთვის უფრო იაფია და ენერგომატარებლებზე ფასებს ამცირებს“, – ციტირებს The Financial Times-ი ურსულა ფონ დერ ლაიენს.