აშშ-ის პრეზიდენტის, ჯო ბაიდენის ადმინისტრაციამ გააუქმა 10 მილიონი დოლარის ჯილდო, რომელიც დაწესებული იყო სირიის დე ფაქტო ლიდერის, აჰმედ ალ-შარაას დაპატიმრებაში დახმარებისთვის. ინფორმაციას ამის შესახებ BBC ავრცელებს.
მანამდე აჰმედ ალ-შარაას ამერიკელი დიპლომატების დელეგაცია შეხვდა.
სახელმწიფო მდივნის თანაშემწემ, ბარბარა ლიფმა, რომელიც ხელმძღვანელობდა დელეგაციას, განაცხადა, რომ ალ-შარაასთან შეხვედრა ძალიან პროდუქტიული იყო.
აჰმედ ალ-შარაა შეიარაღებული მოძრაობა „ჰაიათ თაჰრირ ალ-შამის“ ლიდერია, რომელიც ჯერ კიდევ ოფიციალურად აკრძალულია, როგორც ტერორისტული ორგანიზაცია ბევრ ქვეყანაში, მათ შორის შეერთებულ შტატებში.
დეკემბრის დასაწყისში მოძრაობამ წამყვანი როლი ითამაშა ბაშარ ალ-ასადის რეჟიმის დამხობაში.
სახელმწიფო დეპარტამენტის წარმომადგენელმა განაცხადა, რომ მოლაპარაკებებზე განიხილეს სირიაში „პოლიტიკური ტრანზიციის პრინციპები“ და „ისლამური სახელმწიფოს“ წინააღმდეგ ბრძოლის გაგრძელების აუცილებლობა.