ამერიკის შეერთებული შტატების მთავრობას ე.წ. შათდაუნი ემუქრება.
როგორც „სიენენი“ იუწყება, შათდაუნის საფრთხე დღის წესრიგში მას შემდეგ დადგა, რაც დონალდ ტრამპის მიერ მხარდაჭერილი დაფინანსების კანონპროექტი წარმომადგენელთა პალატაში ჩავარდა. 20 დეკემბერს პალატის რესპუბლიკელი წევრები დახურულ კარს მიღმა შეიკრიბნენ გეგმის შესამუშავებლად. ორსაათიანი შეხვედრის შემდეგ პალატის სპიკერმა მაიკ ჯონსონმა თქვა, რომ მთავრობის ე.წ შათდაუნი არ მოხდება და შუადღისით ხელახალი კენჭისყრა გაიმართება.
მანამდე, თეთრ სახლში განაცხადეს, რომ ფედერალური სამსახურის თანამშრომლები უკვე გააფრთხილეს მოსალოდნელი ე.წ შათდაუნის შესახებ. როგორც პრესსპიკერი კარინ ჟან-პიერი ამბობს, პრეზიდენტი ჯო ბაიდენი უკვე ესაუბრა სენატსა და წარმომადგენელთა პალატაში დემოკრატების ლიდერ – ჩაკ შუმერსა და ჰაკიმ ჯეფრისს.
ე.წ. შათდაუნის შემთხვევაში, 20 დეკემბრის საღამოს ფედერალური უწყებების დაფინანსება დასრულდება და სხვადასხვა სამსახურის მუშაობა, საჰაერო მიმოსვლიდან სამართალდამცავ უწყებებამდე, შესაძლოა, უკვე შაბათ-კვირას შეფერხდეს.