ევროსაბჭოს გენერალური მდივნის სტუმრობა და რეაქცია, რომელიც შემდეგ ვნახეთ, ძალიან კარგი მაგალითია იმისა, თუ როგორ ყალიბდება ხოლმე აღქმები, – ამის შესახებ საქართველოს პარლამენტის თავმჯდომარე შალვა პაპუაშვილმა განაცხადა
მისი შეფასებით, ქართულმა ოპოზიციამ და ენჯეოსექტორმა წარმოაჩინეს სახე და შეიძლება ითქვას, რომ ევროპის დონეზე შეგვარცხვინეს.
„ძალიან კარგი მაგალითია ევროსაბჭოს გენერალური მდივნის სტუმრობა და რეაქცია, რომელიც შემდეგ ვნახეთ. მათ შორის, გუშინ შემაჯამებელი „ტვიტი“ დაწერა და უნდა ნახოთ ის სიძულვილის და მუქარის კორიანტელი, რომელიც მას კომენტარებში აქვს. პირდაპირ წარმოაჩინა სახე ქართულმა ოპოზიციამ და ენჯეოსექტორმა ევროსაბჭოს მიმართ და შეიძლება ითქვას, რომ ევროპის დონეზე შეგვარცხვინეს. მაგრამ, კარგი მაგალითია ზუსტად ეს, როგორ ყალიბდება ხოლმე აღქმები. მათ რაც გააკეთეს გუშინ, თუ ამ დღეებში, ვნახეთ, რომ ევროსაბჭოს გენერალურ მდივანს დააბრალეს ლამის კრემლთან კავშირი და თავის მომხრეების ნაწილში ალბათ ეს აღქმა შექმნეს და ზუსტად ის სიძულვილი, რომელიც მის „ტვიტებს“ მოჰყვა, ამის მანიშნებელია და ეს აისახება ხოლმე შემდეგ თავად, მათ შორის, ეუთო/ოდირის დასკვენებში.
ერთ პასაჟს წაგიკითხავთ კიდევ ეუთო/ოდირის დასკვნიდან, რომელიც საქართველოს ეხება, რომელსაც ცდილობენ, თითქოს სათავისოდ მოირგონ. საუბარია, რომ კამპანიის განმავლობაში კვლავ ფართოდ იყო გავრცელებული ცნობები ამომრჩევლებზე, განსაკუთრებით საჯარო სექტორში დასაქმებულებზე განხორციელებული წნეხის შესახებ. ამ ცნობებთან ერთად, არჩევნების დღეს ამომრჩევლებზე აღრიცხვამ გააჩინა წუხილი, რამდენად შეძლებდა ზოგიერთი ამომრჩეველი შიშის გარეშე არჩევანის გაკეთებას. მთელი ეს აბზაცი, ორი წინადადება არის აწყობილი იმ აღქმებზე, რომელიც იქმნებოდა ცნობების გამო და ზუსტად ამას ვხედავდით ჩვენ. ამაზე ვსაუბრობდი კიდევაც, რომ იქმნებოდა საინფორმაციო ხმაური, რომელიც შემდეგ გავლენას მოახდენდა, შემდეგ რა თქმა უნდა აისახება სხვადასხვა ანგარიშებსა თუ სხვადასხვა ჯგუფების აღქმებში, თითქოს იყო დაშინება ან ზეწოლა, მაგრამ კარგია, რომ ეუთო/ოდირი ზუსტად ამას უსვამს ხაზს, რომ იყო ცნობები ზეწოლასთან დაკავშირებით. თავად ეუთო/ოდირი არცერთ ადგილას არ ამტკიცებს, რომ ასეთი ფაქტები არსებობდა“, – განაცხადა პაპუაშვილმა.
მისივე თქმით, აქ რომ ჩამოდიან იმ ელჩების, უცხოელ პარლამენტარების წაქეზებულია ეს სამარცხვინო ისტერია, რომელსაც პოლიტიკური ჯგუფები და მათი მოკავშირე „ენჯეოები“ უწყობენ ყველას, ვინც მათ ნარატივში არ ჯდება.
„ამ დღეების ფაქტები გენ მდივნის სტუმრობაზე, ზუსტად ასე აჩვენებს, ცარიელ ადგილზე როგორ ქმნიან ყალბ ნარატივებს, თითქოს ამ მნიშვნელოვანი ორგანიზაციის ხელმძღვანელი, იმის გამო, რომ რაღაც არ მოეწონათ მის რომელიღაც წინადადებაში, პირდაპირ გამოაცხადეს ლამის რუსეთის აგენტად. პირდაპირ საუბრობდა ამას ზოგიერთი მათი წარმომადგენელი, მათ შორის „ნაციონალურმა მოძრაობამ“ მიმართა ევროსაბჭოს, რომ განიხილოს ამ ადამიანის საკითხი. ასეთ აბსურდზე გვაქვს საუბარი, როდესაც ნებისმიერი ადამიანი, რომელიც მათ ნარატივში არ ჯდება, პირდაპირ ხდება მისი სტიგმატიზება, როგორც რუსეთის აგენტისა და მორჩა, მერე იმის მიმართ ყველაფერი შეიძლება. ეს არის ზუსტად ის ბოლშევიზმი, ლიბერალური ფაშიზმი, რომელიც დღეს, მათ შორის გარედან წაქეზებით საქართველოშია.
რაც შეეხება ამ დამოკიდებულებას, გასაგებია რაც ხდება. ჩვენ საქმე გვაქვს რადიკალურ ჯგუფებთან, რომლებიც სამწუხაროდ გარედან არიან მხარდამჭერილი და ახლა ვეკითხები მათ, რომელ პოლიტიკურ ჯგუფებშიც ისინი წევრიანდებიან და ვინც მათ ხელს ართმევს – გვარამიას, „დროას“, „ნაციონალურ მოძრაობას“, „ლელოს“, თუ სხვა პარტიებს, იმ ელჩებს, იმ უცხოელ პარლამენტარებს, აქ რომ ჩამოდიან და ჩახუტებაში რომ არიან ამ რადიკალებთან, ზუსტად მათი წაქეზებულია ეს სამარცხვინო ისტერია, რომელსაც ეს პოლიტიკური ჯგუფები და მათი მოკავშირე „ენჯეოები“ უწყობენ ყველას, ვინც მათ ნარატივში არ ჯდება. ეს არის ბოლშევიზმი 100 წლის თავზე. ბოლშევიზმი მაშინაც უცხოეთიდან შემოვიდა საქართველოში და ახლაც თანამედროვე ბოლშევიზმი უცხოეთიდან წაქეზებით არის ქართული საზოგადოების აი ამ ჯგუფში დაბუდებული“, – განაცხადა პაპუაშვილმა.