რუსეთის პრეზიდენტის ვლადიმერ პუტინის ექსპერიმენტული რაკეტა „ორეშნიკი“, რომელიც მან გასულ თვეში უკრაინის წინააღმდეგ გაისროლა, დასავლური ტექნოლოგიების დახმარებით არის შექმნილი. ინფორმაციას The Financial Times-ი ავრცელებს.
გამოცემის ინფორმაციით, საშუალო მანძილზე მოქმედი ბალისტიკური რაკეტის დასამზადებლად, რუსულმა კომპანიებმა „სიმენსის“, „ჰაიდენჰაინისა“ და „ფანუკის“ მაღალტექნოლოგიურ კომპიუტერული სისტემები გამოიყენეს. აღნიშნული საწარმოებიდან ორი გერმანულია, ერთი კი იაპონური.
გამოცემა ექსპერტებზე დაყრდნობით წერს, რომ ამ სფეროში ადგილობრივი ალტერნატივების შექმნის მცდელობის მიუხედავად, კრემლი კვლავ უცხოურ ტექნოლოგიებზეა დამოკიდებული.
The Financial Times-ი წერს, რომ სანქციების მიუხედავად, რუსეთმა 2024 წელს რაკეტის წარმოებისთვის საჭირო 3 მილიონი დოლარის ღირებულების ტვირთის მიღება შეძლო, მათ შორის „ჰაიდენჰაიმის“ შექმნილი კომპონენტების.