უკრაინის ჯარებმა კურსკის ოლქში დაკავებული ტერიტორიის დაახლოებით ნახევარი დაკარგეს და დანარჩენი ნაწილი რამდენიმე თვეში შეიძლება დაკარგონ, – წერს სააგენტო Bloomberg-ი ამერიკელ ოფიციალურ პირებზე დაყრდნობით.
სტატიაში აღნიშნულია, რომ უკრაინის შეიარაღებული ძალები უკვე განიცდიან ცოცხალი ძალის ნაკლებობასა და გაურკვევლობას შეერთებული შტატებისა და სხვა მოკავშირეებისგან იარაღის სამომავლო მიწოდებასთან დაკავშირებით.
გარდა ამისა, კურსკის ოლქში უკრაინულ ჯარებს წინააღმდეგობას უწევენ არა მხოლოდ რუსები, არამედ ჩრდილოკორეელი ჯარისკაცებიც.
აშშ-ის ოფიციალურმა პირებმა გამოცემა Bloomberg-ს განუცხადეს, რომ იანვარში მოსკოვის მხრიდან უფრო კონცენტრირებული ძალისხმევის პირობებში, უკრაინული ძალები ამ ტერიტორიის შენარჩუნებას მხოლოდ გაზაფხულამდე შეძლებენ.
„ვინაიდან რუსეთი ახლა დომინირებს ბრძოლის ველზე, მას შეიძლება ჰქონდეს სტიმული, შეაჩეროს მოლაპარაკებები, რადგან ის ცდილობს რაც შეიძლება მეტი ტერიტორიის აღებას მოლაპარაკებამდე“, – ნათქვამია სტატიაში.