ქურთების ლიდერმა, აბდულა ოჯალანმა, შესაძლოა, ამბოხების დასრულების შესახებ განაცხადოს. „ქურთისტანი მუშათა პარტიის“ ლიდერმა, რომელიც 1999 წლიდან პატიმრობაშია, განაცხადა, რომ მზადაა, ხელი შეუწყოს თურქებსა და ქურთებს შორის მშვიდობას.
ქურთების მხარდამჭერი „სახალხო დემოკრატიული პარტიის“ წევრები აბდულა ოჯალანს იმრალის კუნძულზე მდებარე ციხეში ესტუმრნენ და მისი განცხადებები გაასაჯაროვეს.
„მე მაქვს საჭირო კომპეტენცია და მონდომება, რომ პოზიტიური წვლილი შევიტანო ახალ პარადიგმაში, რომელსაც მხარს უჭერენ ბ-ნი ბაჰჩელი და ბ-ნი ერდოღანი. მზად ვარ, გადავდგა საჭირო პოზიტიური ნაბიჯები და გავაკეთო საჭირო მოწოდება“, – განაცხადა ოჯალანმა, რომლის სიტყვები ციტირებულია „სახალხო დემოკრატიული პარტიის“ განცხადებაში.
თურქეთის პრეზიდენტის, რეჯეფ თაიფ ერდოღანის ახლო მოკავშირემ, დევლეთ ბაჰჩელიმ ოქტომბერში აბდულა ოჯალანი თურქეთის საკანონმდებლო ორგანოში მიიწვია, რათა საჯაროდ გამოეცხადებინა დაჯგუფების დაშლა და იარაღის დაყრა. „ქურთისტანი მუშათა პარტია“ 1984 წლიდან იბრძვის თურქეთის სამხრეთ-აღმოსავლეთში ავტონომიური სახელმწიფოსთვის და ძალადობას ათიათასობით ადამიანის სიცოცხლე ემსხვერპლა. დაჯგუფებას თურქეთი და დასავლეთის ქვეყნები ტერორისტულ ორგანიზაციად მიიჩნევენ.