რუსული გაზის მიწოდების შეჩერებაზე პასუხისმგებლობა შეერთებულ შტატებს, უკრაინის ხელისუფლებას და ევროპის ქვეყნებს ეკისრებათ, – ამის შესახებ რუსეთის საგარეო საქმეთა სამინისტროს ოფიციალურმა წარმომადგენელმა, მარია ზახაროვამ განაცხადა.
ზახაროვას თქმით, მათ თავიანთი მოქალაქეების კეთილდღეობა „ამერიკის ეკონომიკის ფინანსურ მხარდაჭერას შესწირეს“.
„კონკურენტული და ეკოლოგიურად სუფთა რუსული ენერგიის მიწოდების შეწყვეტა არა მხოლოდ ასუსტებს ევროპის ეკონომიკურ პოტენციალს, არამედ ძალიან უარყოფითად აისახება ევროპის მოქალაქეების ცხოვრების სტანდარტზე“, – ამბობს ზახაროვა.
ზახაროვამ ამერიკის შეერთებული შტატები ენერგეტიკული ბაზრის გადანაწილების მთავარ ბენეფიციარად და უკრაინის კრიზისის სპონსორად დაასახელა.
შეგახსენებთ, პირველი იანვრიდან კიევმა ევროპაში რუსული გაზის უკრაინის გავლით ტრანზიტი შეწყვიტა.