2025 წლის პირველი იანვრიდან პოლონეთი ევროკავშირის საბჭოს თავმჯდომარე ქვეყანა გახდა. მანამდე საბჭოს ექვსი თვის განმავლობაში უნგრეთი ხელმძღვანელობდა.
პოლონეთის პრემიერ-მინისტრის, დონალდ ტუსკის განცხადებით, პოლონეთის თავმჯდომარეობა მრავალი თვალსაზრისით ინოვაციური იქნება.
„თავმჯდომარეობა გამოწვევებით სავსე პერიოდში იწყება, რომელიც ხასიათდება კონფლიქტებით და ჩვენი ამოცანა იქნება, დავარწმუნოთ ევროკავშირის წევრი 27-ვე ქვეყანა, რომ ევროპა შეიძლება, კვლავ იყოს ყველაზე უსაფრთხო, ყველაზე სტაბილური ადგილი დედამიწაზე. მომდევნო ექვსი თვის განმავლობაში უსაფრთხოება ჩვენი მთავარი პრიორიტეტი იქნება“, – განაცხადა ტუსკმა.
დონალდ ტუსკის თქმით, ამ დროის განმავლობაში პოლონეთი ეცდება, უკრაინა სათანადო მხარდაჭერით უზრუნველყოს.
„ჩვენ ყველაფერს გავაკეთებთ, რათა ევროპის უსაფრთხოება იყოს რეალობა და არამხოლოდ მისწრაფება. იმედი მაქვს, პოლონეთი მიმართავს ძალისხმევას, რომელიც მშვიდობას უზრუნველყოფს. წარმატებები ვუსურვოთ საკუთარ თავს ამ საქმეში“, – ამბობს დონალდ ტუსკი.