უკრაინის პრეზიდენტმა ვოლოდიმირ ზელენსკიმ განაცხადა, რომ საპრეზიდენტო არჩევნები ქვეყანაში შესაძლებელია ჩატარდეს მხოლოდ ომის ცხელი ფაზის დამთავრების შემთხვევაში, – წერს უკრაინული მედია.
ერთ-ერთ ინტერვიუში ზელენსკიმ განაცხადა, რომ ჯერჯერობით ის არ არის მზად გასცეს ზუსტი პასუხი იმის თაობაზე, აპირებს თუ არა მეორე ვადით პრეზიდენტად კენჭის ყრას.
„მე არ ვიცი, როგორ დამთავრდება ომი. თუ მე შევძლებ გავაკეთო უფრო მეტი, ვიდრე შემიძლია, მაშინ, ალბათ, შემეძლება შევხედო ამ გადაწყვეტილებას უფრო დადებითად. დღეს ეს ჩემთვის არ არის მიზანი“, – განაცხადა ზელენსკიმ.
მისი თქმით, სანამ არ ჩატარდება ახალი საპრეზიდენტო არჩევნები მოქმედი პრეზიდენტი აგრძელებს მოვალეობის შესრულებას.
„პრეზიდენტიც და პარლამენტიც რჩება ლეგიტიმური იქამდე, სანამ ახალი პრეზიდენტი არ იქნება არჩეული“, – აღნიშნა ზელენსკიმ.
ცნობისთვის, ზელენსკიმ განაცხადა, რომ მსოფლიოში არავის არ მოუთხოვია უკრაინისგან ჩაატაროს არჩევნები ომის დროს. უკრაინის პრეზიდენტის ოფისის ხელმძღვანელმა, ანდრეი ერმაკმა განაცხადა, რომ უკრაინაში არჩევნები ომის დამთავრებისთანავე ჩატარდება, რათა სამხედროებსა და იმ ადამიანებს, რომლებმაც ქვეყანა დატოვეს ხმის მიცემის საშუალება ჰქონდეთ.