უკრაინის პრეზიდენტმა, ვოლოდიმირ ზელენსკიმ განაცხადა, რომ დონალდ ტრამპს შეუძლია გადამწყვეტი როლი ითამაშოს ომის დასრულებაში. ინფორმაციას ამის შესახებ „ამერიკის ხმა“ ავრცელებს.
ზელენსკიმ ასევე აღნიშნა, რომ ახლა პრიორიტეტი ფრონტის ხაზის სტაბილიზაციაა. მისი თქმით, პუტინს ეშინია მოლაპარაკებების, რადგან ეს რუსეთის დამარცხების ტოლფასი იქნება.
„ტრამპმა შეიძლება გადამწყვეტი როლი ითამაშოს. ეს ჩვენთვის ყველაზე მთავარია. ის და მისი თვისებები. მას შეუძლია გადამწყვეტი როლი ითამაშოს ამ ომში. მას შეუძლია შეაჩეროს პუტინი, ან, სამართლიანად რომ ვთქვათ, დაგვეხმაროს პუტინის შეჩერებაში. მას შეუძლია ამის გაკეთება“, – აღნიშნა უკრაინის პრეზიდენტმა.
ზელენსკიმ ასევე განაცხადა, რომ უკრაინისთვის სამართლიანი მშვიდობის მიღწევა ნიშნავს მოკავშირეებისგან უსაფრთხოების საიმედო გარანტიების მიღებას.
„რა თქმა უნდა, უსაფრთხოების ნებისმიერი გარანტია შეერთებული შტატების მონაწილეობის გარეშე უკრაინისთვის სუსტი გარანტიაა“, – დასძინა მან.