გრენლანდიის პრემიერ-მინისტრი მუტე ეგედე დანიისგან დამოუკიდებლობის მოწოდებით გამოვიდა. ინფორმაციას ამის შესახებ გამოცემა POLITICO ავრცელებს.
„ახლა დროა გადავდგათ შემდეგი ნაბიჯი ჩვენი ქვეყნისთვის. მსოფლიოს სხვა ქვეყნების მსგავსად, ჩვენ უნდა ვიმუშაოთ თანამშრომლობისთვის დაბრკოლებების აღმოსაფხვრელად, რაც შეგვიძლია აღვწეროთ, როგორც კოლონიური ეპოქის ბორკილები. ჩვენი თანამშრომლობა სხვა ქვეყნებთან და ჩვენი სავაჭრო ურთიერთობები არ შეიძლება გაგრძელდეს მხოლოდ დანიის გავლით. გრენლანდიის, როგორც დამოუკიდებელი სახელმწიფოს ჩარჩოს შექმნაზე მუშაობა უკვე დაწყებულია“, – აღნიშნა გრენლანდიის პრემიერ-მინისტრმა.
დანიასთან 2009 წლის შეთანხმების თანახმად, გრენლანდიას დამოუკიდებლობის გამოცხადება მხოლოდ წარმატებული რეფერენდუმის შემდეგ შეუძლია.
მსოფლიოს უდიდესი კუნძული გრენლანდია 1814 წელს დანიის დაქვემდებარებაში მოექცა. 1979 წელს დანიის პარლამენტმა გრენლანდიას ფართო ავტონომია მიანიჭა.
23 დეკემბერს, გრენლანდიის პრემიერ-მინისტრმა, მუტე ეგედემ განაცხადა, რომ კუნძული არ იყიდება მას შემდეგ, რაც აშშ-ის არჩეულმა პრეზიდენტმა, დონალდ ტრამპმა აღნიშნა, რომ „ეროვნული უსაფრთხოებისა და მთელ მსოფლიოში თავისუფლების მიზნებისთვის, აშშ მიიჩნევს, რომ გრენლანდიის საკუთრებაში ქონა აუცილებლობაა“.