პარასკევს, 3 იანვარს, ჰოლანდიის პოლიციამ განაცხადა, რომ დაკავებულია მამაკაცი, რომელიც საპორტო ქალაქ როტერდამში სამი ადამიანის მკვლელობაშია ეჭვმიტანილი. მკვლელობების სერია ამ ქალაქში უკვე ორი კვირა გრძელდება, რამაც ადგილობრივ მოსახლეობას შიში ჩაუნერგა და მთავარ ახალ ამბად იქცა ნიდერლანდებში, სადაც შეიარაღებული ძალადობა, როგორც წესი, ორგანიზებულ დანაშაულებრივ ჯგუფებთან ასოცირდება. პოლიციამ დააკავა 24 წლის მამაკაცი, რომელსაც ფიქსირებული საცხოვრებელი ადგილი არ გააჩნია, დანაშაულის ადგილზე კი იარაღი იპოვა. მთავარმა პროკურორმა, უგო ჰილენაარმა ჟურნალისტებს განუცხადა, რომ დანაშაულის მოტივი ჯერ დადგენილი არ არის.
„ეს კოშმარი იყო როტერდამის ყველა მცხოვრებლისთვის, ისევე როგორც პირადად ჩემთვის და ამ საქმეში ჩართული ყველა სამართალდამცავისთვის, რადგან ქალაქში ვიღაც თავისუფლად დადიოდა და შემთხვევით მსხვერპლს ესროდა“, – აღნიშნა ჰილენაარმა.
პროკურორის გარმარტებით, ეჭვმიტანილი კარიბის ზღვის კუნძულ კურასაოზე დაიბადა, მაგრამ ნიდერლანდებში გაიზარდა. მოზარდობისას მან პოლიციას თავი ისეთი წვრილმანი დანაშაულებით „დაამახსოვრა“, როგორიცაა მაღაზიების გაქურვა. უფრო მძიმე დანაშაული კი 21 დეკემბერს მოხდა – თავში ტყვია ესროლეს 63 წლის მამაკაცს, რომელიც მიყენებული ჭრილობების შედეგად მოგვიანებით გარდაიცვალა. დაახლოებით ერთი კვირის შემდეგ, იმავე ტერიტორიაზე, მსგავს ვითარებაში, 58 წლის მამაკაცი მოკლეს. როტერდამის პოლიციის უფროსი, ფრედ ვესტერბეკე ამბობს, რომ მისმა გუნდმა სწრაფად დაადინა კავშირი ამ ორ მკვლელობას შორის, მაგრამ მესამის თავიდან აცილება ვერ შეძლო – ხუთშაბათს, 2 იანვარს, 81 წლის მამაკაცი ჩაცხრილეს.
ვეტერბეკეს განცხადებით, ოფიცრებმა ეჭვმიტანილი მაღაზიაში ხუთშაბათს საღამოს დაკითხეს, მაგრამ ვიდეოკამერის მიერ დაფიქსირებულ ბუნდოვან გამოსახულებაში მისი ამოცნობა ვერ მოახერხეს. პოლიციამ ეჭვმიტანილს ფოტო გადაუღო და მისი ვინაობა დაადგინა, რამაც სამართალდამცავებს საშუალება მისცა ის, იმავე დღეს, შუაღამემდე ცოტა ხნით ადრე დაეკავებინათ. პოლიციამ სამ მსხვერპლს შორის კავშირი ვერ დაადგინა, ამიტომ გამოითქვა ვარაუდი, რომ ისინი შემთხვევით აირჩიეს. როტერდამის მერის, კაროლა შუტენის თქმით, პოლიციის მიერ ეჭვმიტანილის დაკავება მისთვის „შვების მომგვრელია“.
„ამით საშინელი სიტუაცია დასრულდა. ახლა ჩვენ შეგვიძლია ვუთანაგრძნოთ ერთმანეთს და მწუხარების ჟამს, გვერდში დავუდგეთ მოკლულთა ოჯახებს“, – დასძინა მან.