ჯო ბაიდენი ჯორჯ სოროსსა და ჰილარი კლინტონს თავისუფლების მედლით დააჯილდოებს. ამერიკული მედიის ინფორმაციით, თეთრ სახლში დაგეგმილ ღონისძიებაზე თავისუფლების მედალი, საერთო ჯამში, 19 ადამიანს გადაეცემა. მათ შორის იქნებიან პოლიტიკოსები, ფილანთროპები, კულტურისა და სპორტის სფეროს წარმომადგენლები. აქედან ოთხ ადამიანს მედალი სიკვდილის შემდეგ მიენიჭებათ.
„მედალი გადაეცემათ იმ პირებს, რომლებმაც სამაგალითო წვლილი შეიტანეს შეერთებული შტატების კეთილდღეობის, ღირებულებების ან უსაფრთხოების, მსოფლიო მშვიდობის ან სხვა მნიშვნელოვანი საზოგადოებრივი, საჯარო თუ კერძო წამოწყების საქმეში. ეს ცხრამეტი ამერიკელი დიდი ლიდერია, რომლებმაც ამერიკა უკეთეს ადგილად აქციეს. ისინი დიდი ლიდერები არიან, რადგან კარგი ადამიანები არიან, რომლებმაც განსაკუთრებული წვლილი შეიტანეს თავიანთ ქვეყანასა და მსოფლიოში“, – აღნიშნულია თეთრი სახლის განცხადებაში.
2016 წელს ჰილარი კლინტონი გახდა პირველი ქალი, რომელიც დემოკრატიულმა პარტიამ დაასახელა პრეზიდენტობის კანდიდატად, თუმცა მოგვიანებით დონალდ ტრამპთან დამარცხდა; სოროსმა, რომელმაც დააარსა ღია საზოგადოების ფონდები, 32 მილიარდ დოლარზე მეტი ოდენობის თანხა შეიტანა თავის ორგანიზაციაში. ის ასევე არის დემოკრატიული პარტიის მთავარი დონორი;
თავისუფლების საპრეზიდენტო მედლის მიმღებთა შორისაა შეფმზარეული ხოსე ანდრესი, რომლის „მსოფლიო ცენტრალური სამზარეულო“ დაეხმარა მშვიდობიანი მოსახლეობის საკვებით უზრუნველყოფას ომის ზონებსა და სტიქიური უბედურებებით დაზარალებულ რაიონებში;
ჯეინ გუდალი, აღიარებული კონსერვაციონისტი და მეცნიერი; ბილ ნაი, მეცნიერ-პედაგოგი, რომელმაც პოპულარობა მოიპოვა გადაცემით, „ბილ ნაი – მეცნიერი ბიჭი“; ასევე დაჯილდოვდება ჯგუფ „იუ2“-ს მომღერალი ბონო; მსახიობები: მაიკლ ფოქსი და დენზელ ვაშინგტონი; სპორტსმენები: ლიონელ მესი და ერვინ „მეჯიქ“ ჯონსონი; მოდის სამყაროს წარმომადგენლები: ანა ვინტური და რალფ ლორენი.
ბაიდენი პატივს მიაგებს უკვე გარდაცვლილ რამდენიმე მიმღებს, მათ შორის რობერტ კენედის, რომელიც მოკლეს 1968 წელს საპრეზიდენტო არჩევნების დროს. კენედი იყო სენატორი, რომელიც წარმოადგენდა ნიუ იორკს და მსახურობდა გენერალურ პროკურორად თავისი ძმის, პრეზიდენტ ჯონ კენედის ადმინისტრაციის დროს; ასევე, სიკვდილის შემდეგ მედალი მიენიჭება ეშტონ კარტერს, რომელიც იყო თავდაცვის მდივანი ობამას ადმინისტრაციის დროს და კურირებდა შეერთებული შტატების მიერ ისლამური სახელმწიფოს წინააღმდეგ ბრძოლას; ასევე მიჩიგანის გუბერნატორს 1960-იან წლებში, ჯორჯ რომნის, ყოფილი სენატორის, მით რომნის მამას. თავად ბაიდენმა თავისუფლების საპრეზიდენტო მედალი 2017 წელს ობამას ადმინისტრაციის ბოლო დღეებში მიიღო.