აშშ-ის პრეზიდენტმა, ჯო ბაიდენმა 19 ადამიანი, მათ შორის ჯორჯ სოროსი, ჰილარი კლინტონი, დენზელ ვაშინგტონი, ანა ვინტური და ბონო თავისუფლების მედლით დააჯილდოვა.
დაჯილდოების ცერემონია თეთრ სახლში გაიმართა.
ბაიდენის ადმინისტრაციის ცნობით, ჯილდოზე წარდგენილ ადამიანებს განსაკუთრებული წვლილი მიუძღვით ქვეყნისა და მსოფლიოს წინაშე.
„ერთად თქვენ ტოვებთ წარმოუდგენელ კვალს ჩვენს ქვეყანაში“, – განაცხადა ბაიდენმა ცერემონიაზე სიტყვით გამოსვლისას.
ჰილარი კლინტონი 2016 წელს გახდა პირველი ქალი, რომელიც დემოკრატიულმა პარტიამ დაასახელა პრეზიდენტობის კანდიდატად, თუმცა მოგვიანებით დონალდ ტრამპთან დამარცხდა;
მედალი მიიღო სოროსმა, რომელმაც დააარსა ღია საზოგადოების ფონდები და 32 მილიარდ დოლარზე მეტი ოდენობის თანხა შეიტანა თავის ორგანიზაციაში. თეთრი სახლის განცხადებით, მილიარდერი ფილანტროპი და დემოკრატიული პარტიის უმსხვილესი დონორი მხარს უჭერდა ორგანიზაციებს და პროექტებს მთელ მსოფლიოში, რომლებიც აძლიერებდნენ დემოკრატიას, ადამიანის უფლებებს, განათლებას და სოციალურ სამართლიანობას.
თავისუფლების საპრეზიდენტო მედლის მიმღებთა შორისაა შეფმზარეული ხოსე ანდრესი, რომლის „მსოფლიო ცენტრალური სამზარეულო“ დაეხმარა მშვიდობიანი მოსახლეობის საკვებით უზრუნველყოფას ომის ზონებსა და სტიქიური უბედურებებით დაზარალებულ რაიონებში;
ჯგუფ „იუ2“-ს სოლისტი ბონო, რომელსაც ასევე მიღებული აქვს საფრანგეთის უმაღლესი ჯილდო კულტურის სფეროში, ცნობილია სიღარიბისა და აივ ინფექციის წინააღმდეგ კამპანიით;
მოდის სფეროს გამოჩენილ წარმომადგენელს, ანა ვინტურს, რომელიც 188 წლიდან ჟურნალ „ვოგის“ მთავარი რედაქტორი იყო, სხვა საქველმოქმედო ორგანიზაციებთან ერთად, წვლილი მიუძღვის შიდსის კვლევებისთვის 20 მილიონზე მეტი დოლარის შეგროვებაში;
ჯილდო გადაეცა ფილმის „უკან, მომავალში“ ვარსკვლავს, მაიკლ ჯეი ფოქსს. აშშ-ის პრეზიდენტმა აღნიშნა მსახიობის წვლილი პარკინსონის დაავადების საწინააღმდეგო კვლევების მხარდაჭერაში;
თავისუფლების მედალი ასევე მიიღეს ფეხბურთელმა ლიონელ მესიმ, კალათბურთელმა ირვინ „მეჯიქ“ ჯონსონმა და დიზაინერმა რალ ლორენმა.
ოთხ პირს კი მედალი სიკვდილის შემდგომ მიენიჭა. მათ შორის, რობერტ კენედის, რომელიც მოკლეს 1968 წელს საპრეზიდენტო არჩევნების დროს. კენედი იყო სენატორი, რომელიც წარმოადგენდა ნიუ იორკს და მსახურობდა გენერალურ პროკურორად თავისი ძმის, პრეზიდენტ ჯონ კენედის ადმინისტრაციის დროს; ასევე, ეშტონ კარტერს, რომელიც იყო თავდაცვის მდივანი ობამას ადმინისტრაციის დროს და კურირებდა შეერთებული შტატების მიერ ისლამური სახელმწიფოს წინააღმდეგ ბრძოლას; მიჩიგანის გუბერნატორს 1960-იან წლებში, ჯორჯ რომნის, ყოფილი სენატორის, მით რომნის მამას.