ავსტრიის მმართველმა „ავსტრიის სახალხო პარტიამ“ კანცლერ კარლ ნეჰამერის შემცვლელად კრისტიან შტოკერი დაასახელა. კრისტიან შტოკერი მმართველი პარტიის გენერალური მდივანი და დეპუტატია. შტოკერს განიხილავენ, როგორც გამოცდილ და მშვიდ შუამავალს, რომელიც ხშირად ჩნდება ავსტრიულ მედიაში საკამათო გადაწყვეტილებების დასაცავად.
ავსტრიის კანცლერმა, კარლ ნეჰამერმა 4 იანვარს განაცხადა, რომ გადადგება უახლოეს დღეებში მას შემდეგ, რაც მოლაპარაკებები ახალი მთავრობის ფორმირებ თაობაზე მეორედ ჩაიშალა. ეს მოხდა მას შემდეგ, რაც „სახალხო პარტიამ“ და „სოციალ-დემოკრატებმა“ განაგრძეს კოალიციური მოლაპარაკებები ლიბერალური „ნეოსის“ მოულოდნელი გასვლის შემდეგ.
კოალიციური მოლაპარაკებები თვეების განმავლობაში გაგრძელდა. „ნეოსი“ ავსტრიის კანცლერის, კარლ ნეჰამერის კონსერვატიულ „ავსტრიის სახალხო პარტიასა“ და მემარცხენე-ცენტრისტულ „სოციალ-დემოკრატებთან“ ერთად ცდილობდა სამპარტიული მმართველი კოალიციის შექმნას მას შემდეგ, რაც მემარჯვენე „თავისუფლების პარტიამ“ გაიმარჯვა სექტემბერში ჩატარებულ ეროვნულ არჩევნებში ხმების 28.8 პროცენტით.