უკრაინამ, პარასკევის ღამეს და შაბათის დილას, ესტონეთის საზღვართან მდებარე რუსეთის ტერიტორიას დრონებით დაარტყა, ასევე ცეცხლი გაუხსნეს უსტ-ლუგას პორტს. ექსპერტების განცხადებით, არც დრონებს და არც საჰაერო თავდაცვის სისტემებს ესტონეთის საჰაერო სივრცე არ დაურღვევიათ. ეს თავდასხმა რუსეთსა და უკრაინას შორის მიმდინარე ომში მნიშვნელოვან მომენტს წარმოადგენს.
ესტონეთის თავდაცვის ლიგის უპილოტო საფრენ აპარატებთან მუშაობის კოორდინატორი, აივარ ჰანიოტი ამბობს, რომ იმ უკრაინული დრონის ფრენის ტრაექტორია, რომელმაც უსტ-ლუგას პორტამდე მიაღწია, სწორხაზოვანი არ ყოფილა და ესტონეთის საჰაერო სივრცეზე არ გადიოდა.
„სავარაუდოა, რომ ოპერაცია კიევის რეგიონიდან დაიწყო და ლენინგრადის ოლქამდე ის დიდი ქალაქებისა და კრიტიკული ინფრასტრუქტურის გვერდის ავლით გაგრძელდა. ასეთ შემთხვევაში, თვითმფრინავის ტიპის შემტევი დრონების გამოყენებით ფართო სპექტრის სამიზნეებამდე მიღწევა სავსებით შესაძლებელია“, – აცხადებს ჰანიოტი.
ის ასევე განმარტავს, თუ რატომ არ შეუძლიათ რუსეთის საჰაერო თავდაცვის სისტემებს კრიტიკულ ინფრასტრუქტურაზე მიმართული ყველა თავდასხმის მოგერიება.
„საჰაერო თავდაცვის სისტემებით ასეთი დიდი ტერიტორიის მთლიანად დაცვა ფიზიკურად შეუძლებელია. ყოველთვის იქნება ადგილები, რომლებიც დაუცველი დარჩება. ამ ხარვეზების ცოდნისა და გამოყენების, ასევე წინა მისიების გამოცდილების გათვალისწინების შემთხვევაში, ძალიან წარმატებული ოპერაციების ჩატარება შეიძლება“, – აღნიშნა საჰაერო თავდაცვის საკითხების სპეციალისტმა.
სამხედრო-საჰაერო ძალების კონტროლისა და ანგარიშგების ცენტრის ცნობით, უკრაინას, დრონებით განხორციელებული შეტევის დროს, ესტონეთის საჰაერო სივრცე და რუსული საჰაერო თავდაცვის სისტემები არ გამოუყენებია.
უსაფრთხოების საკითხების ექსპერტი, რაივო ვარე უსტ-ლუგას პორტზე თავდასხმას მნიშვნელოვან მოვლენად მიიჩნევს. თავად პორტის გარდა, ამ ტერიტორიაზე განთავსებულია სხვა მნიშვნელოვანი ობიექტებიც, მათ შორის – რუსეთში უდიდესი ქვანახშირის ტერმინალი.
„საქონლის როგორც იმპორტის, ასევე ექსპორტის თვალსაზრისით, ეს ძალიან მნიშვნელოვანი პორტია. მეორე: უსტ-ლუგა არის მთავარი პორტი, საიდანაც ცენტრალური რუსეთი მარგდება. მესამე: ის გავლენას ახდენს არა მხოლოდ პეტერბურგის, არამედ მოსკოვის სამომხმარებლო ბაზარზე. გარდა ამისა, პორტის გავლით ხორციელდება რამდენიმე სახის საწვავის ტრანსპორტირება და აქ „გაზპრომის“ ქარხანა მდებარეობს“, – განმარტავს ვარე.
უკრაინული დრონების სამიზნე უსტ-ლუგა ადრეც ყოფილა, მაგრამ წინა თავდასხმების დროს დარტყმების შესახებ ინფორმაცია არ გავრცელებულა.