ლიბანის პარლამენტმა ქვეყნის შეიარაღებული ძალების მეთაური ჯოზეფ აუნი პრეზიდენტად აირჩია. ხმის მიცემის მეორე ტურში აუნის კანდიდატურას 99 დეპუტატმა დაუჭირა მხარი. პირველ ტურში მან 71 ხმა მიიღო, რაც 128-ადგილიან პარლამენტში საჭირო ორი მესამედისთვის საკმარისი არ აღმოჩნდა. პარლამენტის წინაშე სიტყვით გამოსვლისას აუნმა განაცხადა, რომ იწყება „ლიბანის ისტორიის ახალი ფაზა“. 60 წლის პრეზიდენტმა პირობა დადო, რომ ექვსწლიანი ვადის განმავლობაში ქვეყანაში გაატარებს პოლიტიკურ და ეკონომიკურ რეფორმებს. როგორც პრეზიდენტი, აუნი არ იქნება პასუხისმგებელი აღმასრულებელ გადაწყვეტილებებზე, თუმცა მას ევალება კანონპროექტების ხელმოწერა, პოლიტიკურ პარტიებთან კონსულტაცია პრემიერ-მინისტრის დანიშვნის თაობაზე.
2022 წლის მაისის საპარლამენტო არჩევნების შემდეგ ლიბანი მთავრობის გარეშე დარჩა. მაშინდელმა პრემიერ-მინისტრმა, ნაჯიბ მიკატიმ ვერ შეძლო ახალი მთავრობის შექმნა პრეზიდენტ მიშელ აუნის უფლებამოსილების ვადის ამოწურვამდე, რის გამოც ქვეყანა შეზღუდული უფლებამოსილების მქონე მთავრობით დარჩა. ამის შემდეგ პარლამენტმა 12-ჯერ სცადა ახალი პრეზიდენტის არჩევა, მაგრამ უშედეგოდ. ლიბანში პრეზიდენტის არჩევა მხოლოდ მას შემდეგ შეძლეს, რაც სხვა კანდიდატმა, სულეიმან ფრანჟიემ, რომელსაც აქამდე „ჰეზბოლა“ უჭერდა მხარს, უარი თქვა პრეზიდენტობაზე და მხარი დაუჭირა არმიის მეთაურს, როგორც შესაფერის კანდიდატს პრეზიდენტის თანამდებობისთვის.
ჯოზეფ აუნს პრეზიდენტად არჩევა მიულოცა საფრანგეთის პრეზიდენტმა, ემანუელ მაკრონმა. ასევე ბეირუთში აშშ-ის საელჩომ განაცხადა, რომ მზად არიან, ითანამშრომლოს აუნთან, როდესაც ის დაიწყებს რეფორმების გატარებას და ქვეყნის გაერთიანებას.