6 იანვარს, შენობაში, სადაც ბელგიის პრემიერ-მინისტრის ოფისია განთავსებული, დანით შეიარაღებული მამაკაცი შეიჭრა. 9 იანვარს კი საბოლოოდ დადგინდა, რომ ალექსანდრ დე კროოსთვის გასული წლის ნოემბერში გაგზავნილ წერილში ნაპოვნი თეთრი ფხვნილი ნამდვილად საწამლავია. მაშინ პრემიერის ოფისის ერთ-ერთი თანამშრომელი საავადმყოფოში გადაიყვანეს.
გასული წლის 22 ნოემბერს, ბელგიის პრემიერ-მინისტრის თანაშემწე, ოფისში შემოსულ კონვერტში არსებულ ტოქსიკურ ფხვნილთან კონტაქტის შემდეგ, საავადმყოფოში გადაიყვანეს.
„მან კონვერტი გახსნა და თავი ცუდად იგრძნო. ის საავადმყოფოში გადაიყვანეს, სხვა არავინ დაშავებულა“, – განაცხადა ხუთშაბათს, 9 იანვარს დე კროოს სპიკერმა, ბარენდ ლეიტსმა.
„ამ ინციდენტმა პრემიერი-მინისტრი და მისი მთელი გუნდი შეძრა“, – აღნიშნა მან და დასძინა, რომ დაშავებული თანამშრომელი, „საბედნიეროდ, ახლა კარგად არის, მაშინ კი ყველა ზომა იქნა მიღებული შემდგომი შესაძლო საშიშროებისს თავიდან ასაცილებლად“.
გამოძიებით დადგინდა, რომ წერილი შეიცავდა ტოქსიკურ პროდუქტს: სტრიქნინს – შხამს, რომელიც შეიძლება ფატალური იყოს და, როგორც წესი, მღრღნელების გასანადგურებლად გამოიყენება.
ამ შემთხვევამდე ორი დღით ადრე, მოწამლული კონვერტი ბელგიის შინაგან საქმეთა მინისტრის ოფისშიც შევიდა. მსგავსი ფოსტა იმავე სამთავრობო შენობაში 9 დეკემბერს კიდევ ერთხელ მიიღეს, რის შემდეგაც ერთ-ერთი თანამშრომელი კარანტინში მოათავსეს. თუმცა, დაზიანების ან ჰოსპიტალიზაციის შესახებ სხვა მონაცემები არ არსებობს.
უსუნო თეთრი ფხვნილი სტრიქნინი, ძირითადად, ვირთხების დასახოცად გამოიყენება. მან ადამიანებში შეიძლება კუნთების სპაზმი, გულის გაჩერება და სიკვდილი გამოიწვიოს.
სტრიქნინის შემცველი წერილის შესახებ ინფორმაციის გავრცელებამდე რამდენიმე დღით ადრე, ბრიუსელში, დე კროოს ოფისში შესვლის მცდელობის დროს, დანით შეიარაღებული მამაკაცი დააკავეს. ხელისუფლება ახლა ამ ორ ინციდენტს შორის შესაძლო კავშირს იძიებს.
ალექსანდრე დე კროო, რომელიც 2024 წლის 9 ივნისს გამართული საკანონმდებლო ორგანოს არჩევნების შემდეგ პრემიერ-მინისტრის მოვალეობას ასრულებს, ბოლო შემთხვევის დროს, თავის კაბინეტში არ იმყოფებოდა.
ხელისუფლების მიერ მოწოდებული ინფორმაციის თანახმად, ორშაბათს, 6 იანვარს, დილით, პრემიერ-მინისტრის ოფიციალურ რეზიდენციას მამაკაცი მიუახლოვდა, რომელიც იქ მყოფ სამხედრო მოსამსახურეებს დაემუქრა. აღნიშნული პირი პოლიციის მოსვლამდე გაანეიტრალეს.
Rue de la Loy, სადაც პრემიერ-მინისტრის ოფიციალური რეზიდენცია მდებარეობს, ბელგიის დედაქალაქის ერთ-ერთი ყველაზე დატვირთული ქუჩაა. აქ ასევე განთავსებულია ქვეყნის რამდენიმე ოფიციალური დაწესებულება და ევროკავშირის შენობა.