ე.წ. პოლარიზაციის დაძლევა, ჯანსაღი დემოკრატიული სისტემის ჩამოყალიბება, გრძელვადიან რეჟიმში ქვეყნის ეროვნული უსაფრთხოების უზრუნველყოფა მხოლოდ იმ შემთხვევაშია შესაძლებელი, თუ ქვეყნის პოლიტიკური სისტემა სრულად განთავისუფლდება ჯაშუშებისგან და მასში მხოლოდ ეროვნული, საკუთარი ხალხის ინტერესებზე ორიენტირებული პოლიტიკური ძალები იქნებიან წარმოდგენილი, – ამის შესახებ„ერთიანი ნეიტრალური საქართველოს“ წევრმა გელა ნიკოლაიშვილმა დღეს გამართულ ბრიფინგზე განაცხადა.
მისივე თქმით, ზემოთ ხსენებულის გათვალისწინებით „ერთიანი ნეიტრალური საქართველო“ ამზადებს საჩივარს ჯაშუშურ საქმიანობაში ჩართული პოლიტიკოსების წინააღმდეგ, რომელსაც საქართველოს გენერალურ პროკურატურაში უახლოეს დღეებში შეიტანენ.
„გუშინ მმართველმა გუნდმა საზოგადოებას გააცნო ინიციატივა საქართველოს პარლამენტში საგამოძიებო კომისიის შექმნის შესახებ, რომელიც რეჟიმის წარმომადგენლების მიერ ჩადენილ დანაშაულებს შეისწავლის და „ნაციონალური მოძრაობის“ მმართველობას შეაფასებს.
სჯობს გვიან, ვიდრე არასდროს – სახელისუფლებო გუნდის ეს გადაწყვეტილება ცალსახად დადებითად უნდა შეფასდეს. თუმცა, მიგვაჩნია, რომ საგამოძიებო კომისიის ფორმატში 2003-12 წლებში ჩადენილი დანაშაულების შესწავლა არის აუცილებელი, მაგრამ არასაკმარისი პირობა იმ პრობლემის საბოლოოდ აღმოსაფხვრელად, რომლის წინაშეც ქართული სახელმწიფო დღემდე დგას.
საქართველოში დღესაც მოქმედებს ჯაშუშური ქსელი, რომელიც პოლიტიკურ სპექტრში სხვადასხვა რადიკალური ოპოზიციური პარტიით არის წარმოდგენილი. დღეს ეს პარტიები და მათი ლიდერები ჯაშუშურ საქმიანობას თავისუფლად აწარმოებენ და საქართველოს მუდმივი რყევის რეჟიმში ამყოფებენ. სწორედ ეს არის მათი მთავარი დავალება – არ დაასვენონ ქვეყანა და სახელმწიფოს აღქმა მაქსიმალურად დააკნინონ. სამწუხაროდ, იმ პირობებში, როდესაც მათ დანაშაულებზე სახელმწიფო პროპორციულად არ რეაგირებს, ხდება ქვეყანაში ჯაშუშობის ლეგალიზება. ჩვენ ჯაშუშობაში ვგულისხმობთ ყველა იმ ადამიანს თუ პარტიას, რომელიც საკუთარი სამშობლოს ინტერესებზე წინ აყენებს სხვა ქვეყნის ინტერესებს.
რადიკალური ოპოზიციის და მისი ლიდერების მიერ ჩადენილი დანაშაულები ხელის გულზე დევს. სააკაშვილის, გვარამიას, ხაზარაძის, გახარიას და მათი თანამზრახველების დანაშაულებს დიდი გამოძიება არ სჭირდება. თუმცა რა თქმა უნდა გამოძიება აუცილებელია, მთავარია, სახელმწიფომ გაბედოს დანაშაულზე რეაგირება და პროკურატურამ აღძრას შესაბამისი საქმეები საქართველოს სისხლის სამართლის კოდექსის საფუძველზე.
ჯაშუშების ადგილი არის არა პოლიტიკაში, არამედ სასჯელაღსრულების დაწესებულებაში. ეს არის სამართლის უზენაესობის უპირობო მოთხოვნა. ამ პრინციპის დაცვის გარეშე, საქართველო ვერასოდეს შედგება, როგორც სრულფასოვანი დემოკრატიული სახელმწიფო გამართული პოლიტიკური სისტემით.
ყოველივე ზემოაღნიშნულის გათვალისწინებით, ჩვენ ვამზადებთ ასევე მასალებს, საჩივარს ჯაშუშურ საქმიანობაში ჩართული პოლიტიკოსების წინააღმდეგ, რომელსაც საქართველოს გენერალურ პროკურატურაში მომზადების შემდეგ შევიტანთ.
ე.წ. პოლარიზაციის დაძლევა, ჯანსაღი დემოკრატიული სისტემის ჩამოყალიბება, გრძელვადიან რეჟიმში ქვეყნის ეროვნული უსაფრთხოების უზრუნველყოფა მხოლოდ იმ შემთხვევაშია შესაძლებელი, თუ ქვეყნის პოლიტიკური სისტემა სრულად განთავისუფლდება ჯაშუშებისგან და მასში მხოლოდ ეროვნული, საკუთარი ხალხის ინტერესებზე ორიენტირებული პოლიტიკური ძალები იქნებიან წარმოდგენილი“, – განაცხადა გელა ნიკოლაიშვილმა.