გაზრდილი მგზავრთნაკადის პირობებში თბილისისა და ბათუმის საერთაშორისო აეროპორტების მმართველი კომპანია „ტავ ჯორჯია“ მაღალი ხარისხის სერვისის უზრუნველსაყოფად ინფრასტრუქტურის განვითარებას განაგრძობს.
თბილისის საერთაშორისო აეროპორტის მოფრენის ტერმინალში საიმიგრაციო ზონა გაფართოვდა და დაემატა საპასპორტო კონტროლის ჯიხურები. უფრო კონკრეტულად, საპასპორტო კონტროლის ჯიხურების რაოდენობა გაიზარდა ცხრიდან 13-მდე, სასაზღვრო ჯიხურებამდე მისასვლელი სივრცე კი გაფართოვდა 640-დან 925 კვ.მ.-მდე. შეგახსენებთ, რომ გამგზავრების ტერმინალშიც გაფართოვდა საემიგრაციო ზონა 180-დან 530 კვ.მ.-მდე და საპასპორტო კონტროლის ჯიხურების რაოდენობა ცხრიდან 13-მდე გაიზარდა. მოეწყო სასაზღვრო ჯიხურამდე მისასვლელი სწრაფი დერეფანი. ამ ორივე პროექტში „ტავ ჯორჯიამ“ ინვესტიციის სახით ჩადო ოთხ მილიონ ლარზე მეტი.
თბილისის საერთაშორისო აეროპორტში 2024 წელს მგზავრთნაკადმა რეკორდულ მაჩვენებელს მიაღწია. აეროპორტი წლის განმავლობაში 4,750,830 მგზავრს მოემსახურა. 2023 წელთან შედარებით, გასულ წელს მგზავრთნაკადის 29%-იანი ზრდა დაფიქსირდა. გაზრდილი სივრცე და დამატებითი ჯიხურები თბილისის საერთაშორისო აეროპორტს საშუალებას მისცემს, გაზარდოს საზღვრის გამტარუნარიანობა და გააუმჯობესოს მგზავრების მომსახურების ხარისხი. „ტავ ჯორჯია“ ფრანგული ADP ჯგუფის წევრი და TAV Airports Holding-ის შვილობილი კომპანიაა. მისი საქმიანობა საქართველოში 2005 წელს დაიწყო.
კომპანიამ თბილისისა და ბათუმის აეროპორტების აშენებასა და განვითარებაში განახორციელა 220 მილიონ ამერიკულ დოლარზე მეტი ინვესტიცია. TAV Airports Holding-ის მიერ მსოფლიოს სხვადასხვა ქვეყანაში განხორციელებული მრავალმილიონიანი ინვესტიციის, აეროპორტების ოპერირებაში მრავალწლიანი გამოცდილებისა და გონივრული მენეჯმენტის შედეგად „ტავ ჯორჯია“ საქართველოში ერთ-ერთ ყველაზე სანდო, სტაბილურ და დინამიკურ კომპანიას წარმოადგენს და ყველაზე მსხვილი დამსაქმებელია საქართველოს საავიაციო ბაზარზე.