სირიის ახალმა ხელისუფლებამ, რომელიც პრეზიდენტ ბაშარ ასადის დამხობის შემდეგ მოვიდა ქვეყნის სათავეში, რუსეთთან ტარტუსის პორტის მართვის შესახებ ხელშეკრულება გაწყვიტა. ინფორმაციას რუსული მედია ტარტუსის პროვინციის საბაჟო სამმართველოს დირექტორზე რიად ჯუდიზე დაყრდნობით ავრცელებს.
„რუსულ კომპანიასთან დადებული ხელშეკრულება ტარტუსის პორტში ინვესტიციების განხორციელების შესახებ ანულირებულია. პორტის მუშაობის შედეგად მიღებული მთლიანი ფული სირიის სახელმწიფოს ინტერესებს მოხმარდება“, – თქვა ჯუდიმ.
სირიამ და რუსეთმა პორტის მართვის შესახებ ხელშეკრულება 2019 წელს 49-წლიანი ვადით გააფორმეს. დოკუმენტი რუსეთს პორტის მოდერნიზაციის მიზნით 500 მილიონი დოლარის გამოყოფას ავალდებულებდა.
ცნობისთვის, ტარტუსში რუსეთის სამხედრო-საზღვაო ბაზა მდებარეობს, ხოლო ლატაკიის პროვინციის ქალაქ ხმეიმიმში – რუსული ავიაბაზა. სირიაში ახალი ხელისუფლების მოსვლის შემდეგ მათი ბედი ჯერ-ჯერობით უცნობია.