2020 წელსაც გახსოვთ, 1 წელი დასჭირდა იმას, რომ ოპოზიციას არჩევნები ეღიარებინა და მანდატები მიეღო. ზუსტად იგივე პროცესები იყო მაშინაც, – განაცხადა საქართველოს პარლამენტის თავმჯდომარე შალვა პაპუაშვილმა გადაცემა „იმედი LIVE“-ში.
მისი თქმით, 2020 წელს განვითარებულ პროცესებს და დღევანდელობას შორის მხოლოდ ერთი სხვაობაა – დღეს ის უცხოელი აქტორები, რომლებიც ოპოზიციას კულისებიდან მართავდნენ და არ ჩანდნენ, დღეს ღიად გამოჩნდნენ და თავის თავზე აიღეს გარკვეული ქმედებები.
„ჩვენს წინასაარჩევნო პროცესში სხვადასხვა უცხოური პოლიტიკური ჯგუფები იყვნენ ჩართულები და ისინიც დამარცხდნენ „ნაცმოძრაობასთან“ და მის მოკავშირეებთან ერთად. ეს არის გარკვეულწილად ქართველი ხალხის მიმართ გამოვლენილი გარკვეული შურისძიება, რომელსაც ვხედავთ სხვადასხვა პოლიტიკური ჯგუფებისგან, ვინაიდან ისინიც დამარცხდნენ არჩევნებში. ვერ გაიმარჯვა იმ ძალამ, რომელიც მათი მარიონეტია და ქართველმა ხალხმა თავისი ხელისუფლება აირჩია. 2020 წელსაც გახსოვთ, 1 წელი დასჭირდა იმას, რომ ოპოზიციას არჩევნები ეღიარებინა და მანდატები მიეღო. ზუსტად იგივე პროცესები იყო მაშინაც, რასაც ახლა ვხედავთ. ერთადერთი სხვაობაა – ის უცხოელი აქტორები, რომლებიც დღეს ღიად ჩანან, მაშინ ოპოზიციის ზურგს უკან იყვნენ ამოფარებულები და იქიდან აგულიანებდნენ და აქეზებდნენ მათ. მაშინაც ჩანდა მათი აჩრდილი ოპოზიციის უკან, მაშინაც მათი კარნახით იყო ყველაფერი. 19 აპრილის შეთანხმებაზე, როდესაც მედიაციის პროცესი გვქონდა, ერთ-ერთ პუნქტზე ვიკითხე, ვისგან იყო ეს, რადგან იყო საკითხები, რომლებიც არასდროს არავის დაუყენებია პოლიტიკურ დისკუსიაში და ჩანდა, რომ ეს იყო სხვადასხვა გარე ძალებისგან ჩადებული ინსტრუმენტები, გარკვეული საკანონმდებლო მარწუხები, რომელიც შესაძლებლობას მისცემდა ჩვენი ქვეყნის გარედან უკეთ მართვას.
რასა იუკნევიჩიანე მაშინაც რასა იუკნევიჩიანე იყო და ჟიგიმანტას პავილიონისი – ჟიგიმანტას პავილიონისი. უბრალოდ ისი მაშინ ოპოზიციას და „ენჯეოებს“ ალაპარაკებდნენ, მაგრამ შემდეგ ნახეს, რომ მათი ხელითაც არ გამოდის ის საქმე – ქართველი ხალხის ნების წინააღმდეგ ხელისუფლების შეცვლის მიზნები და დღეს თავის თავზე აიღეს გარკვეული ქმედებები“, – განაცხადა პაპუაშვილმა.