პარტია „ხალხის ძალის“ წევრი დავით ქართველიშვილი სოციალურ ქსელში აშშ-ს 47-ე პრეზიდენტის გადაწყვეტილებას ეხმაურება, რომელიც კონკრეტულ ვადებში, ჯონ კენედის, რობერტ კენედისა და მარტინ ლუთერ კინგის მკვლელობების საქმეების ყველა საიდუმლო დოკუმენტის გასაჯაროებას უკავშირდება.
ანალიტიკოსის თქმით, ტრამპის ეს გადაწყვეტილება მრავალწლიანი სპეკულაციების აღმოფხვრას და საზოგადოებისთვის სრული ინფორმაციის მიწოდებას ემსახურება. დავით ქართველიშვილმა აღნიშნა, რომ არაა გამორიცხული დონალდ ტრამპის მსგავსი მიდგომა საზოგადოებამ 2001 წლის 11 სექტემბრის მოვლენებთან დაკავშირებითაც დაინახოს.
„2025 წლის 23 იანვარს, აშშ-ის პრეზიდენტმა დონალდ ტრამპმა ხელი მოაწერა ისტორიულ განკარგულებას, რომელიც ითვალისწინებს ყველა დარჩენილი საიდუმლო დოკუმენტების გასაჯაროებას, რომლებიც უკავშირდება პრეზიდენტ ჯონ კენედის, სენატორ რობერტ კენედის და სამოქალაქო უფლებების მოძრაობის ლიდერის, მარტინ ლუთერ კინგის მკვლელობებს.
ტრამპის განკარგულების თანახმად, ეროვნული დაზვერვის სამსახურის დირექტორმა ჯონ კენედის მკვლელობის ეპიზოდში – 15 დღის განმავლობაში უნდა წარმოადგინოს ამ დოკუმენტების სრულად გასაჯაროების გეგმა. რაც შეეხება რობერტ კენედისა და მარტინ ლუთერ კინგის მკვლელობას – ამ დოკუმენტაციის გასაჯაროების გეგმა უნდა მომზადდეს 45 დღის განმავლობაში.
პრეზიდენტმა ტრამპმა აღნიშნა, რომ მიუხედავად იმისა, რომ ამ ტრაგიკული მოვლენებიდან 50 წელზე მეტი დრო გავიდა, ფედერალურმა მთავრობამ ჯერ კიდევ არ გაასაჯაროვა ამ მკვლელობებთან დაკავშირებული ყველა დოკუმენტური ჩანაწერი. მან ხაზი გაუსვა, რომ გარდაცვლილთა ოჯახებს და ამერიკელ ხალხს აქვთ უფლება, იცოდნენ სიმართლე.
აღსანიშნავია, რომ 2017 წელს ტრამპმა უკვე წამოიწყო ნაწილობრივი გასაჯაროება ჯონ კენედის მკვლელობის დოკუმენტებზე, თუმცა ზოგიერთი მასალა კვლავ საიდუმლოდ დარჩა, ეროვნული უსაფრთხოების ინტერესებიდან გამომდინარე. ბოლო საარჩევნო კამპანიის დროს, მან კვლავ გამოთქვა დაპირება ამ მონაცემების სრულად გასაჯაროებაზე.
ეს გადაწყვეტილება მიზნად ისახავს მრავალწლიანი სპეკულაციებისა და შეთქმულების თეორიების აღმოფხვრას, რომლებიც დაკავშირებულია ამ მკვლელობებთან და საზოგადოებისათვის, მნიშვნელოვანი ისტორიული მოვლენების შესახებ, სრული ინფორმაციის მიწოდებას. არაა გამორიცხული, რომ ასევე წინასაარჩევნო დაპირებების ფარგლებში, მსგავსი მიდგომა დავინახოთ 2001 წლის 11 სექტემბრის მოვლენების მიმართაც“, – წერს დავით ქართველიშვილი სოციალურ ქსელში.