„დღეს სწორედ ჩვენმა, ადგილობრივი ლიბერალური ფაშიზმის ნებსით თუ უნებლიედ “გულანთებულმა” მხარდამჭერებმა – პირდაპირ თუ ირიბად ხელი შეუწყვეს მათი დაფინანსებისთვის არა თბილისიდან, არამედ ვაშინგტონიდან წამოსულ “საფრთხეებს”, თეთრ სახლში შესული ახალი ადმინისტრაციის სახით – “რაც მოგივა დავითაო…”-ს პრინციპით,” -ამის შესახებ სოციალურ ქსელში პარტია „ხალხის ძალის” წევრი დავით ქართველიშვილი წერს, რითაც აშშ-ს პრეზიდენტის დონალდ ტრამპის ბრძანებას – 90 დღით შეჩერდეს საგარეო პროექტების დაფინანსება ეხმიანება.
ექსპერტი იხსენებს, როგორი ვნებათაღელვა მოჰყვა გამჭვირვალობის შესახებ კანონის მიღებას ქართული ენჯეოების მხრიდან. ისინი ამტკიცებდნენ, რომ ქვეყნისთვის მნიშვნელოვანი პროექტების მუშაობა შეჩერდებოდა. ახლა ქართველიშვილი მათ მოუწოდებს ამერიკის ახალი ადმინისტრაციის მხრიდან შეჩერებული პროექტების დაფინანსება საქართველოში ამერიკის საელჩოსთან გააპროტესტონ.
„ალბათ შეგხვედრიათ წარწერა დაკეტილ სოფლის მაღაზიაზე: “ვიქნები ნახევარ საათში”. რაც შეეხება წარწერებს USAID-ის “კანტორებზე” მთელ მსოფლიოში, ის უფრო კონკრეტულია: “ვიქნები ან 90 დღეში ან საერთოდ არ ვიქნები”. 2025 წლის 24 იანვარს, აშშ-ის სახელმწიფო დეპარტამენტმა სწორედ USAID-ის ხაზით გამოაცხადა საერთაშორისო დახმარების ყველა არსებული პროგრამის შეჩერების შესახებ.
ამასთან, შეჩერდა აქამდე შეთანხმებული ახალი პროგრამების დაფინანსებაც. ეს გადაწყვეტილება ემსახურება პრეზიდენტ დონალდ ტრამპის მიერ გამოცემულ განკარგულებას, რომელიც ითვალისწინებს 90-დღიან აღებულ პაუზას საერთაშორისო დახმარების ყველა პროგრამის გადასინჯვისთვის. გამონაკლისი მხოლოდ (!) ისრაელისა და ეგვიპტისთვის სამხედრო დაფინანსებას, ასევე სასწრაფო საკვები დახმარების ჰუმანიტარულ პროგრამებს შეეხება.
როგორ აისახება ეს პროექტებზე? დასაფინანსებელი პროექტების სია მოიცავს ჯანდაცვას, განათლებას, სოფლის მეურნეობას და სამოქალაქო საზოგადოების მხარდაჭერას. მაგალითად, უკრაინაში შეჩერდა სკოლების მხარდაჭერისა და მედიცინის დახმარების პროექტები, მათ შორის ბავშვების ვაქცინაცია და დედათა დახმარების პროგრამები. ვინ და რამ გამოიწვია ამ ესოდენ საჭირო პროგრამების შეჩერება? “სოროსისტულ-მარქსისტულმა” მიდგომებმა, რომლებმაც “წყალთან ერთად, ჩვილიც გადააყოლეს მდინარეში”, ანუ – რეალურად იმ საჭირბოროტო პროგრამების შეჩერება გამოიწვიეს, რომლებსაც საფარად იყენებდნენ თავის “ფერადრევოლუციურ” გეგმებში.
ტრამპის ამ გადაწყვეტილების მომდევნო ნაბიჯები
სახელმწიფო მდივანმა, მარკო რუბიომ გაახმოვანა: ყველა პროგრამა გადამოწმდება მომდევნო 85 დღის განმავლობაში. საბოლოოდ, თითოეული პროექტი შეფასდება იმ კუთხით, თუ რამდენად უწყობს ხელს ამერიკის უსაფრთხოებას, ძლიერებას და კეთილდღეობას. ამ გადაწყვეტილებამ განგაშის ზარები გამოიწვია კონგრესში. კანონმდებლები შიშობენ, რომ საერთაშორისო პარტნიორები დახმარებას სხვა ქვეყნებისგან, აშშ-ის კონკურენტებისა და მოწინააღმდეგეებისგან მოითხოვენ, რაც შეამცირებს ამერიკის გავლენას გლობალურ არენაზე.
მე მახსოვს (მათ შორის ახლობლების ბანაკიდან) ძირითადი პრეტენზიები “რუსულ” კანონთან დაკავშირებით, რომ სწორედ ის გამოიწვევდა USAID-ის ხაზით იმ პროგრამების დაფინანსების შეჩერებას, რომლებიც მათ ოჯახებს ფინანსურად ასაზრდოებდნენ. კანონის ძალაში შესვლის შემდეგ – არც ერთი ოჯახი არ დაზარალებულა. მაგრამ მათ მიერ ლიბერალური დღის წესრიგის გაშმაგებულმა მხარდაჭერამ თავისი “ლეპტა” შეიტანა ამ გლობალურ სიგიჟესთან საერთაშორისო ბრძოლის საქმეში.
დღეს სწორედ ჩვენმა, ადგილობრივი ლიბერალური ფაშიზმის ნებსით თუ უნებლიედ “გულანთებულმა” მხარდამჭერებმა – პირდაპირ თუ ირიბად ხელი შეუწყვეს მათი დაფინანსებისთვის არა თბილისიდან, არამედ ვაშინგტონიდან წამოსულ “საფრთხეებს”, თეთრ სახლში შესული ახალი ადმინისტრაციის სახით – “რაც მოგივა დავითაო…”-ს პრინციპით. უაზრო “დავებმა”, პატრონის წინაშე ასკინკილათი ცალ ფეხზე ხტუნვამ და უსამშობლობამ იცის ყოველივე ეს. ასე რომ დროა “რუსული” კანონების და მათი ამოქმედების წინააღმდეგ ხელოვნური აგრესიის “ტალღამ” რუსთაველიდან – აშშ-ს საელჩოსთან გადაინაცვლოს…” – წერს დავით ქართველიშვილი.