დარწმუნებული ვარ, ჩვენს პარტნიორებს ეყოფათ გამბედაობა, აღიარონ სიმართლე, რაც უკავშირდება საქართველოში ჩატარებულ არჩევნებს და არ დაეყრდნონ იმ განცხადებებს, ტყუილსა და დეზინფორმაციას, რომელსაც მიზანმიმართულად ავრცელებს ოპოზიცია, – განაცხადა დღის ქრონიკაში“ ჩართვისას საპარლამენტო უმრავლესობის წევრმა, ვლადიმერ ბოჟაძემ.
მან კომენტარი გააკეთა ევროსაბჭოს საპარლამენტო ასამბლეაში საქართველოს დელეგაციის ვიზიტზე და ასევე, სამი ოპოზიციური პარტიის მიერ ასამბლეის პრეზიდენტისა და საპარლამენტო ფრაქციებისთვის მიწერილ წერილზე.
„ჩვენ ჩვენი მხრივ ვაგრძელებთ თანამშრომლობას ჩვენს პარტნიორებთან. ჩვენი დელეგაცია გაემგზავრება და მას თეა წულუკიანი უხელმძღვანელებს, ვინც წლები მუშაობდა სტრასბურგში. იცით, იუსტიციის მინისტრს საკმაოდ მდიდარი გამოცდილება აქვს, პირადი კონტაქტები და დარწმუნებული ვარ, ჩვენს დელეგაციას ექნება საკმარისზე მეტი რესურსი იმისთვის, რომ ჩვენი პარტნიორები, განსაკუთრებით ისინი, ვინც მუდმივად ცდილობენ, ჩვენი ქვეყნის დისკრედიტაციას, საერთაშორისო იზოლაციაში მოქცევას, დაარწმუნონ იმაში, რომ არჩევნები არ გაყალბებულა და ოპოზიციის მცდელობა უკავშირდება ჩვენს ქვეყანაში დესტაბილიზაციას, არეულობას, იმ სცენარს, მაიდანის სცენარს, რომელიც ვერა და ვერ განხორციელდა და ვერც ვერასდროს განხორციელდება.
დარწმუნებული ვარ, ჩვენს პარტნიორებს ეყოფათ გამბედაობა, აღიარონ ის სიმართლე, რაც უკავშირდება საქართველოში ჩატარებულ არჩევნებს და არ დაეყრდნონ იმ განცხადებებს, ტყუილსა და დეზინფორმაციას, რომელსაც მიზანმიმართულად ავრცელებს ოპოზიცია და მიზანმიმართულად ავრცელებენ ის პოლიტიკური ძალები, რომლებიც არ არიან ჩვენს ქვეყანაში მშვიდობითა და სტაბილურობით დაინტერესებული“, – განაცხადა ბოჟაძემ.
სტრასბურგში 27 იანვარს ევროსაბჭოს საპარლამენტო ასამბლეის დებატები იხსნება. დღის წესრიგშია საქართველოს საკითხიც.
როგორც ცნობილია, ევროპის საბჭოს საპარლამენტო ასამბლეის პრეზიდენტსა და საპარლამენტო ფრაქციებს სამმა ოპოზიციურმა პარტიამ – „კოალიცია ცვლილებებისთვის“, „ერთიანობა ნაციონალური მოძრაობა“ და „ძლიერი საქართველო“ მიმართა წერილით, რომ საპარლამენტო ასამბლეაში საქართველოს საპარლამენტო დელეგაციის უფლებამოსილება არ დადასტურდეს.