არაბთა გაერთიანებულ საამიროებში საქართველოს პრემიერ-მინისტრის ვიზიტის შედეგია მრავალმილიონიანი ინვესტიცია, რომელიც განხორციელდება თბილისსა და აჭარაში, – ამის შესახებ აჭარის ავტონომიური რესპუბლიკის მთავრობის თავმჯდომარემ თორნიკე რიჟვაძემ აბუ-დაბიში ქართველ ჟურნალისტებს განუცხადა.
როგორც თორნიკე რიჟვაძემ აღნიშნა, საქართველოს პრემიერ-მინისტრის ხელმძღვანელობით არაბთა გაერთიანებულ საამიროებში გაიმართა უმაღლესი დონის შეხვედრები.
„შეხვედრა შედგა პრეზიდენტთან და ასევე განსაკუთრებით მნიშვნელოვანია, რომ ამ ვიზიტის შედეგი გახლავთ ის მრავალმილიონიანი ინვესტიცია, რომელიც განხორციელდება თბილისსა და აჭარაში, კერძოდ, გონიოს პოლიგონის განვითარების კუთხით. ნამდვილად ეს არის გლობალური საინვესტიციო კომპანია, რომელიც ახალ ბრენდს, ახალ ტექნოლოგიებს შემოიტანს ჩვენს ქვეყანაში. ეს არის კიდევ ერთი დადასტურება ჩვენი ქვეყნის ხელისუფლების მიმართ, მათ შორის ეკონომიკური ზრდის მიმართ არის გამოხატული მაღალი ნდობა. დარწმუნებული ვართ, ამ ინვესტიციების ფარგლებში ათასობით და ათიათასობით სამუშაო ადგილი შეიქმნება, კიდევ მეტად გაძლიერდება ქართული ეკონომიკა და კიდევ უფრო მეტი შესაძლებლობები შეიქმნება საქართველოს მოქალაქეებისთვის. შესაბამისად, EMAAR-ის, ძალიან მსხვილი საინვესტიციო ჯგუფის შემოსვლა ჩვენი ქვეყნისთვის დამოუკიდებლობის პერიოდში, იქნება ყველაზე დიდი მსხვილი კერძო ინვესტიცია, რომელიც განხორციელდება“, – განაცხადა თორნიკე რიჟვაძემ.