ინდოეთში ქვეყნის უდიდეს რელიგიურ ფესტივალზე მასობრივი ჭყლეტის შედეგად, სულ მცირე, 12 ადამიანი დაიღუპა. ინფორმაციას ამის შესახებ „ბიბისი“ ავრცელებს.
მედიის ცნობით, მომლოცველთა დიდმა ჯგუფმა პოლიციის ბარიერების გადალახვა სცადა წმინდა ადგილას მისასვლელად, სადაც განბანვის ცერემონია მიმდინარეობდა, შემდეგ ადამიანთა ნაკადმა მდინარის ნაპირას მძინარე ადამიანებს გადაუარა.
„ხალხი პანიკაში ჩავარდა, როცა ათასობით ადამიანი ერთდროულად დაიძრა წმინდა წყლებისკენ“, – განუცხადა „ბიბისის“ ერთ-ერთმა თვითმხილველმა.
ოფიციალური პირები აცხადებენ, რომ რამდენიმე მომლოცველი მძიმედაა დაშავებული.
როგორც მედია წერს, ფესტივალზე 100 მილიონამდე მომლოცველს ელოდნენ. დილის 10:00 საათისთვის უკვე 36 მილიონზე მეტმა ადამიანმა მიიღო მონაწილეობა წმინდა განბანვის რიტუალში.
მომხდარის გამო, დღის მთავარი ცერემონია გადაიდო. საგანგებო სამსახურები განაგრძობენ ადგილზე მუშაობას. ფაქტზე დაწყებულია გამოძიება.