Emaar-ი არის ერთ-ერთი უმსხვილესი დეველოპერი მსოფლიოში, ის მოცულობის ინვესტიცია, რაც დაანონსდა, ჩვენი ქვეყნისთვის, რა თქმა უნდა, ძალიან მნიშვნელოვანია არა მარტო თანხიდან გამომდინარე, არამედ, Emaar-ის გამოცდილებიდან გამომდინარე, მისი „ნოუჰაუდან“ გამომდინარე, – განუცხადა „ქრონიკას“ „თეთრი კვადრატის“ მმართველმა პარტნიორმა ირაკლი ბურდილაძემ.
მისი თქმით, როდესაც Emaar-ის დონის დეველოპერი შემოდის ქვეყანაში, მას მოაქვს არა მარტო თანხა ინვესტიციის სახით, არამედ, მოაქვს გამოცდილება, ცოდნა, რომელიც აუცილებლად წაადგება დეველოპერულ სექტორს საქართველოში.
„Emaar-ის მიერ განხორციელებული პროექტები, ერთგვარი მიზიდულობის ცენტრები ხდება, ზოგადად და მათ ირგვლივ შემდეგ ახალი ინვესტიციების მოზიდვა ხდება, ახალ მოთამაშეებს უჩნდებათ ინტერესი, რომ ჩადონ ფული, განავითარონ ირგვლივ არსებული ტერიტორიები, რაც ასევე პოზიტიურად აისახება ჩვენი ქვეყნის ეკონომიკაზე დამატებითი ინვესტიციების მოზიდვის კუთხით. რა თქმა უნდა, როდესაც ამხელა თანხის ინვესტიციაზე არის საუბარი, მოგეხსენებათ, უამრავი სამუშაო ადგილი შეიქმნება და საქართველოს ბიუჯეტში საკმაოდ სოლიდური თანხა შევა გადასახადების სახით “, – აღნიშნა ირაკლი ბურდილაძემ.
საქართველოს ისტორიაში უმსხვილესი ინვესტიცია – დეველოპერული კომპანია Emaar Properties/Eagle Hills-ი საქართველოში 6 მილიარდი აშშ დოლარის მოცულობის ინვესტიციას განახორციელებს, – თანამშრომლობის მემორანდუმი კომპანიასა და ქართულ მხარეს შორის აბუ-დაბიში საქართველოს პრემიერ-მინისტრ ირაკლი კობახიძის ვიზიტის ფარგლებში გაფორმდა.