ცოტა ხნის წინ ამერიკულმა მედიამ გამოაქვეყნა დაახლოებით 1,5 მილიონი მიგრანტის სია, რომლებიც ქვეყნიდან დეპორტაციას ექვემდებარებიან. სიაში ლიეტუვას 259 მოქალაქეც შედის. თუმცა, როგორც ლიეტუვას საგარეო საქმეთა სამინისტრო აცხადებს, ლიეტუველების დეპორტაციის განზრახვის შესახებ ოფიციალური ინფორმაცია აშშ-ს ხელისუფლებისგან არ მიუღია.
აშშ-ს საიმიგრაციო და საბაჟო მისიის (ICE) დეპორტაციის აღსრულების სამსახურის მიერ შედგენილ სიაში, რომელიც „ფოქს ნიუსმა“ გამოაქვეყნა, 1 445 549 ადამიანია შეყვანილი. დეპორტაციას დაქვემდებარებულ პირთა სიაში ყველაზე მეტნი ჰონდურასელები (261 000), გვატემალელები (253 000) და მექსიკელები (252 000) არიან. ჩამონათვალში ასევე შედის ლიეტუვას 259, ლატვიის 125 და ესტონეთის 94 მოქალაქე.
„ლიეტუვას საელჩოს ვაშინგტონში დღემდე არ მიუღია მოთხოვნა საკონსულო დახმარების შესახებ ლიეტუვას მოქალაქეებისგან, რომლებიც შეერთებულ შტატებში არალეგალურად ცხოვრობენ და მიიჩნევენ, რომ დეპორტაცია ემუქრებათ“, – ნათქვამია ლიეტუვას საგარეო საქმეთა სამინისტროს კომენტარში, რომელიც ამ უწყებამ ლიეტუვას ეროვნულ ტელე-რადიომაუწყებელს (LRT.lt.) გაეგზავნა.
„თუმცა, აშშ-ს ხელისუფლება არ არის ვალდებული, ლიეტუვას საელჩოს ან საკონსულოებს დეპორტირების შესახებ აცნობოს, თუ ამას თავად მოქალაქეები არ ითხოვენ“, – ხაზგასმით აღნიშნა სამინისტრომ.
„თუ დაკავებული პირი დიპლომატიური მისიის ინფორმირებას ითხოვს, შეერთებულ შტატებში არსებული ლიეტუვას დიპლომატიური მისიები შესაბამის საკონსულო დახმარებას უზრუნველყოფენ“, – ნათქვამია ლიეტუვას საგარეო საქმეთა სამინისტროს კომენტარებში.
მიმართვის შემთხვევაში, ლიეტუვას დიპლომატიური მისიები გამოთქვამენ მზადყოფნას, რომ თანამოქალაქეებს საკონსულო დახმარება გაუწიონ და აშშ-ს ხელისუფლებასთან ითანამშრომლონ, რათა ისინი სამშობლოში შეუფერხებლად დაბრუნდნენ.
„ამისთვის არსებობს შესაბამისი პროცედურები, მაგალითად, სამშობლოში დაბრუნებისთვის საჭირო საბუთების გაცემა. თუმცა, მნიშვნელოვანია აღინიშნოს, რომ დიპლომატიური წარმომადგენლობის ან საკონსულო დაწესებულებების მონაწილეობა ან დახმარება შეზღუდულია: მათ არ შეუძლიათ, გავლენა მოახდინონ ან სხვაგვარად ჩაერიონ მასპინძელი ქვეყნის სამართალდამცავი და სხვა ორგანოების მუშაობაში“, – აცხადებს სამინისტრო.
არაოფიციალური მონაცემებით, ამჟამად შეერთებულ შტატებში ლიეტუვური წარმოშობის 600 000-ზე მეტი ადამიანი ცხოვრობს, აქედან დაახლოებით 30 000 ლიეტუვას მოქალაქეა.
ლიეტუვას საელჩოს ვაშინგტონში არ აქვს მონაცემები იმის შესახებ, თუ რამდენი მათგანი შეიძლება ცხოვრობდეს შეერთებულ შტატებში არალეგალურად, მაგრამ არც იმის ნიშნები არსებობს, რომ მათი რაოდენობა ძალიან დიდია.
ნებისმიერი დეპორტაცია, სავარაუდოდ, დაკავშირებული იქნება ESTA-ს (მოგზაურობის ავტორიზაციის ელექტრონული სისტემა) ან აშშ-ს ვიზის მიღების პირობების, არალეგალურად საქმიანობის ან სხვა საკანონმდებლო დარღვევასთან.
„საელჩო მოუწოდებს ლიეტუვას ყველა მოქალაქეს, პატივი სცენ მასპინძელი ქვეყნის კანონებს და მათ, ვინც არალეგალურად ცხოვრობს აშშ-ში, დატოვონ ქვეყანა ან მოიძიონ ლეგალური სტატუსი, როგორც ეს ამერიკული კანონმდებლობით არის გათვალისწინებული“,- აცხადებს ლიეტუვას საელჩო ვაშინგტონში.
წინასაარჩევნო კამპანიის დროს, აშშ-ს პრეზიდენტმა, დონალდ ტრამპმა პირობა დადო, რომ არალეგალურ იმიგრაციის წინააღმდეგ იბრძოლებდა და თავისი მეორე საპრეზიდენტო ვადა მან აშშ-ს საიმიგრაციო პოლიტიკის შეცვლისკენ მიმართული რიგი განკარგულებების ხელმოწერით დაიწყო.
გასულ კვირას, ფართომასშტაბიანი ოპერაციის დროს, აშშ-ს ხელისუფლებამ 538 მიგრანტი დააკავა და ქვეყანაში არალეგალურად მყოფი ასობით პირის დეპორტირება მოახდინა.