ოპოზიციაში ერთიანობა ვერ შედგა და ვერც შედგება ძალიან მარტივი მიზეზის გამო, რადგან შიგნით აქვთ სრულიად განსხვავებული ხედვები და მოსაზრებები, – ამის შესახებ პარლამენტის ევროპასთან ინტეგრაციის კომიტეტის თავმჯდომარემ, ლევან მახაშვილმა განაცხადა.
როგორც მახაშვილმა აღნიშნა, ოპოზიცია შეეცდება, სალომე ზურაბიშვილი გარშემო შექმნას პლატფორმა, თუმცა, მისივე შეფასებით, ამ მიმართულებით მათი წარმატების იმედი არ აქვს.
„მიუხედავად იმისა, რომ მიდგომები და რადიკალიზაციის ხარისხი ყველას ერთი და იგივე აქვს, საკუთარი ამბიციები არ აძლევთ შესაძლებლობას, ქვეყნის სასარგებლოდ გაერთიანდნენ. საბოლოო ჯამში, მათი მთავარი ამოცანა ის კი არ არის, რა გააკეთონ ქვეყნისთვის სასიკეთო, არამედ ის, როგორ მოვიდნენ ხელისუფლებაში და ჩაიგდონ ძალაუფლება ხელში. მათ ერთობასთან დაკავშირებით დიდი მოლოდინები არ გვაქვს. მოსალოდნელი იყო ის მოსაზრებები, რაც ოპოზიციისგან გვესმის. ისინი, როგორც ხავსს ჩაბღაუჭებულნი, შეეცდებიან, ყოფილი პრეზიდენტის, სალომე ზურაბიშვილი გარშემო ააგონ თავიანთი პლატფორმა, მაგრამ აქაც არ მაქვს დიდი მოლოდინი, რომ ამ მიმართულებით დიდი წარმატება ექნებათ“, – განაცხადა მახაშვილმა.
ცნობისთვის, „სტრატეგია აღმაშენებლის“ ლიდერმა, გიორგი ვაშაძემ განაცხადა: „ოპოზიციამ უპირობოდ დიდი გაერთიანება უნდა ჩამოაყალიბოს. ნახევრად ერთიანობა არ გამოვა. რა არის გასაკეთებელი: სასწრაფოდ, სალომე ზურაბიშვილმა უნდა თქვას, რომ ყველა პოლიტიკურ ძალას ვიხმობ ჩემთან, ერთიან პლატფორმას ვაკეთებთ, უნდა ვიყოთ ერთიანები“.