ამ ადამიანებმა, გახარიამ, ხაზარაძემ, კოლექტიურმა ნაცმოძრაობამ პასუხი უნდა აგონ იმისთვის, რაც ჩვენი ქვეყნის წინაშე ჩაიდინეს, – განაცხადა “ „ერთიანი ნეიტრალური საქართველოს“ ერთ-ერთმა დამფუძნებელმა ვატო შაქარიშვილმა, რომელიც სახელმწიფო ინტერესების ხელყოფის მიზნით, უცხოეთის კონტროლს დაქვემდებარებული ორგანიზაციისთვის მტრულ საქმიანობაში დახმარების, ასევე, საბოტაჟის მცდელობის ფაქტზე მიმდინარე საგამოძიებო მოქმედებების ფარგლებში, ამ წუთებში პროკურატურაში გამოკითხვაზე იმყოფება.
„დღეს მოვედი იმისათვის, რომ ჩვენს ხელთ არსებული საჯარო მასალებისგან შემდგარი ლოგიკური ჯაჭვი წარვუდგინო პროკურატურას. ვფიქრობ სხვა მუხლებითაც, კერძოდ 317-ე და 321-ე პრიმა მუხლებითაც უნდა დაინტერესდეს გამოძიება, რაც გულისხმობს მოწოდებებს საქართველოს კონსტიტუციური წყობილების დამხობისკენ. ასევე 321-ე პრიმა მუხლის არის დაფინანსება ისეთი პროცესების, რომელიც გულისხმობს საქართველოს უსაფრთხოების საფუძვლების შერყევას. მე მაქვს თან მოტანილი აშშ-ის განცხადებები, ილონ მასკის განცხადებები იმასთან დაკავშირებით, რომ usaid, ned-ი და სხვა ფონდები, რომლებიც ივსება ამერიკელი გადასახადების გადამხდელთა დოლარებით, სხვადასხვა ქვეყანაში, კერძოდ საქართველოს და უკრაინაში ირიცხებოდა იმისთვის, რომ აქ მომზადებულიყო რევოლუციური პროცესები, დაფინანსებულიყო ანტისახელმწიფოებრივი კამპანიები. ეს ქსელი არის ძალიან ფართო, მოიცავს არასამთავრობო ორგანიზაციებს, იმ ოთხ პარტიას, რომლებმაც ბარიერი გადალახეს და ყველაფერი გააკეთეს იმისთვის, რომ არჩევნების ლეგიტიმაცია აბსოლუტურად უსაფუძვლოდ კითხვის ნიშნის ქვეშ დაეყენებინა. ამ ადამიანებმა, გახარიამ, ხაზარაძემ, კოლექტიურმა ნაცმოძრაობამ პასუხი უნდა აგონ იმისთვის, რაც ჩვენი ქვეყნის წინაშე ჩაიდინეს“, – აცხადებს შაქარიშვილი.
პროკურატურამ სახელმწიფო ინტერესების ხელყოფის მიზნით, უცხოეთის ორგანიზაციისა და უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარების ფაქტებზე და დამამძიმებელ გარემოებაში საბოტაჟზე გამოძიება დაიწყო.