უკრაინის მხარდაჭერის შესახებ ევროკავშირისა და ბრიტანეთის საგარეო საქმეთა ლიდერების ერთობლივ დეკლარაციას უნგრეთის პრემიერ-მინისტრი ვიქტორ ორბანი ბრიუსელის ცუდი ლიდერობის სამწუხარო მტკიცებულებას უწოდებს.
როგორც ორბანი სოციალურ ქსელ X-ში წერს, ვიდრე ამერიკისა და რუსეთის პრეზიდენტები უკრაინაში მშვიდობაზე მოლაპარაკებებს აწარმოებენ, ევროპელი მაღალჩინოსნები უსარგებლო განცხადებებს აკეთებენ.
ორბანის თქმით, მოლაპარაკებების მაგიდასთან ადგილი კი არ უნდა მოითხოვო, არამედ სიძლიერის, ლიდერობისა და გონივრული დიპლომატიის გზით უნდა მოიპოვო.
უნგრეთის პრემიერ-მინისტრის განმარტებით, ბრიუსელის პოზიცია – ადამიანთა მკვლელობას იქამდე დაუჭირონ მხარი, ვიდრე საჭირო იქნება, მორალურად და პოლიტიკურად მიუღებელია.
ცნობისთვის, საფრანგეთმა, გერმანიამ, პოლონეთმა, იტალიამ, ესპანეთმა, გაერთიანებულმა სამეფომ და ევროკავშირმა ერთობლივი განცხადება გაავრცელეს, სადაც საუბარია იმაზე, რომ უკრაინაში ომის დასრულების საკითხებზე მოლაპარაკებებში ოფიციალური კიევი და ბრიუსელიც უნდა მონაწილეობდნენ.
