აშშ-ის ვიცე-პრეზიდენტმა ჯეი დი ვენსმა The Wall Street Journal-თან ინტერვიუში განაცხადა, რომ ის რუსეთის წინააღმდეგ ახალი სანქციების შემოღებას და უკრაინაში ამერიკული ჯარების გაგზავნას არ გამორიცხავს.
„არსებობს ზემოქმედების ეკონომიკური და, რა თქმა უნდა, სამხედრო ბერკეტები“, – თქვა ვენსმა.
როგორც აშშ-ის ვიცე-პრეზიდენტმა აღნიშნა, უკრაინაში ჯარის გაგზავნა განხილვის საგანია, თუ ვაშინგტონი ნახავს, რომ მოსკოვი კონფლიქტის დარეგულირებაზე უარს აცხადებს.
ამასთან ერთად, ჯეი დი ვენსი ფიქრობს, რომ უკრაინისთვის ევროპის ან აშშ-ის მხრიდან უსაფრთხოების გარანტიების მიცემის შესახებ საუბარი ჯერ ნაადრევია. ვენსის განცხადებით, აღნიშნული პრობლემა, აგრეთვე რუსეთისა და უკრაინის საზღვრების საკითხი მოლაპარაკებების მაგიდასთან უნდა გადაწყდეს.
„არსებობს სხვადასხვა ფორმულირებები, კონფიგურაციები, მაგრამ ჩვენთვის მნიშვნელოვანია, რომ უკრაინას სუვერენული დამოუკიდებლობა ჰქონდეს“, – დასძინა ვენსმა.