რუსეთმა უკრაინაში მდებარე ჩერნობილის ატომური ელექტროსადგური დაბომბა. ინფორმაციას უკრაინის პრეზიდენტი ვოლოდიმირ ზელენსკი „ტელეგრამის“ საკუთარ არხზე ავრცელებს.
„რუსული დამრტყმელი დრონი ფუგასური საბრძოლო ნაწილით ღამე იმ ადგილს მოხვდა, რომელიც მსოფლიოს ჩერნობილის ატომური ელექტროსადგურის მეოთხე განადგურებული ენერგობლოკის რადიაციისგან იცავს“, – დაწერა ზელენსკიმ.
მან აღნიშნა, რომ ამ ენერგობლოკის სარკოფაგს უკრაინა ევროპის სხვა ქვეყნებთან და ამერიკასთან ერთად აშენებდა – „ყველასთან ერთად, ვისაც ადამიანებისთვის ნამდვილი უსაფრთხოება უნდა“.
„ერთადერთი სახელმწიფო მსოფლიოში, რომელსაც ასეთ ობიექტებზე იერიშის მიტანა, ატომური ელექტროსადგურების ტერიტორიების ოკუპაცია და საბრძოლო მოქმედებების წარმოება სამომავლო შედეგების უგულებელყოფით შეუძლია, დღევანდელი რუსეთია. ეს არის ტერორისტული საფრთხე მთელი მსოფლიოსთვის“, – დაწერა ზელენსკიმ.
უკრაინის ლიდერის თქმით, დაბომბვას ხანძარი მოჰყვა, თუმცა ის უკვე ლიკვიდირებულია. რადიაციული ფონი არ გაზრდილა.