თეთრმა სახლმა Associated Press-ის ჟურნალისტებს ოვალურ კაბინეტსა და პრეზიდენტის თვითმფრინავ Air Force One-ზე წვდომა აუკრძალა, ამის მიზეზად კი სააგენტოს მიერ „ამერიკის ყურის“ ტერმინის გამოყენებაზე უარის თქმა დასახელდა. ინფორმაციას ამის შესახებ ტელეკომპანია CNN-ი ავრცელებს.
Associated Press-ი, მსოფლიოს ერთ-ერთი უმსხვილესი საინფორმაციო სააგენტო, განაგრძობს „მექსიკის ყურის“ ტერმინის გამოყენებას, რომელიც საერთაშორისო დონეზეა აღიარებული.
თეთრ სახლში აცხადებენ, რომ ეს „Associated Press-ის დეზინფორმაციისადმი ერთგულებას“ ამჟღავნებს.
„მიუხედავად იმისა, რომ მათი უფლება უპასუხისმგებლო და არაკეთილსინდისიერ ჟურნალისტიკაზე დაცულია პირველი შესწორებით, ეს არ ანიჭებთ მათ პრივილეგიას, შეუფერხებლად ჰქონდეთ წვდომა ისეთ შეზღუდულ ადგილებზე, როგორიცაა ოვალური კაბინეტი და Air Force One“, – განაცხადა თეთრი სახლის ადმინისტრაციის ხელმძღვანელის მოადგილემ, ტეილორ ბუდოვიჩმა.
მან ასევე აღნიშნა, რომ AP-ის ჟურნალისტებს კვლავ შეეძლებათ თეთრი სახლის ტერიტორიაზე მუშაობა, მათ შორის, სპიკერების ბრიფინგებში მონაწილეობა და სხვა ღონისძიებების გაშუქება.