უკრაინას ძალიან დაბალი შანსები აქვს გადარჩეს რუსეთთან ბრძოლაში აშშ-ს დახმარების გარეშე, – განაცხადა NBC News-თან ინტერვიუში უკრაინის პრეზიდენტმა ვოლოდიმირ ზელენსკიმ.
„სავარაუდოდ ეს იქნება ძალიან, ძალიან, ძალიან რთული. და, რა თქმა უნდა, ყველა რთულ სიტუაციაში თქვენ შანსი გაქვთ, მაგრამ ჩვენ ცოტა შანსი გვექნება იმისთვის, რომ აშშ-ს დახმარების გარეშე გადავრჩეთ“, – განაცხადა ზელენსკიმ.
ზელენსკიმ აღნიშნა, რომ პუტინს მოლაპარაკებების მაგიდასთან დაჯდომა არა ომის დამთავრებისთვის სურს, არამედ იმისთვის, რომ ცეცხლის შეწყვეტის შესახებ მოლაპარაკებას მიაღწიოს, სანაცვლოდ კი ზოგიერთი სანქციის მოხსნა მოითხოვოს და თავის სამხედროებს გადაჯგუფების საშუალება მისცეს.
„ეს მართლა ის არის, რაც მას უნდა. მას პაუზის გაკეთება, მომზადება, ზოგიერთი სანქციის მოხსნა უნდა ცეცხლის შეწყვეტის სანაცვლოდ“, – აღნიშნა ზელენსკიმ.
მიუნხენის უსაფრთხოების კონფერენციის ფარგლებში ვოლოდიმირ ზელენსკისთან შეხვედრის შემდეგ აშშ-ის ვიცე-პრეზიდენტმა, ჯეი დი ვენსმა განაცხადა, რომ ვაშინგტონი ცდილობს მიაღწიოს ომის გრძელვადიან დარეგულირებას. ვენსმა ხაზგასმით აღნიშნა, რომ დონალდ ტრამპის ადმინისტრაციის მთავარი მიზანია „ომის დასრულება“.