დავით ჯუღელი არის ჩვეულებრივი „ნაცი“. ის არის სააკაშვილის ადვოკატი და მაღალი ალბათობით ასევე დაკავებულია იმით, რომ „ვივამედიდან“ ინფორმაციები გამოაქვს და შეაქვს სააკაშვილისთვის, – განაცხადა პარლამენტის საპროცედურო საკითხთა და წესების კომიტეტის თავმჯდომარემ, საპარლამენტო უმრავლესობის წევრმა, დავით მათიკაშვილმა ე.წ. „კაბელების საქმის“ მოსამართლის შესახებ.
„ჯუღელი წარმოადგენს ერთ რიგით „ნაცს“, რომელსაც ახლა რუპორი ტელევიზიები დააკონწიალებენ აქა-იქ და ცდილობენ, რომ რაღაც ისეთი ინფორმაცია გამოსტყუონ და აჩვენონ საზოგადოებას, რომელიც საზოგადოების თვალთახედვით რაღაც სკანდალს მოაწყობს. რეალურად, ჯუღელი არის ჩვეულებრივი „ნაცი“. ის არის სააკაშვილის ადვოკატი, ის ასევე არის დაკავებული მაღალი ალბათობით იმით, რომ „ვივამედიდან“ ინფორმაციები გამოაქვს და შეაქვს სააკაშვილისთვის მეტი არაფერი. ამ ადამიანის სანდოობის ხარისხი არის ნულოვანი“, – განაცხადა მათიკაშვილმა.
ე.წ. „კაბელების საქმის“ ერთ-ერთი მოსამართლე დავით ჯუღელი, რომელიც ათი წლის წინ თითქოს მასზე განხორციელებულ ზეწოლაზე საუბრობს და ამ კონტექსტში ბიძინა ივანიშვილის სახელსაც ახსენებს, დღეს მიხეილ სააკაშვილის ადვოკატი და ნდობით აღჭურვილი პირია. ყოფილი მოსამართლე დავით ჯუღელი ბოლო დღეების განმავლობაში ოპოზიციური მედიის შეუცვლელი რესპონდენტი გახდა.