ამერიკელი პროფესორი, ჯეფრი საქსი დონალდ ტრამპსა და ვლადიმირ პუტინს შორის სატელეფონო საუბარს გამოეხმაურა და აღნიშნა, რომ „ეს ყველაზე მნიშვნელოვანი დღე იყო მშვიდობისთვის ბოლო ათწლეულების განმავლობაში“.
ჯეფრი საქსის თქმით, უკრაინაში მიმდინარე ომი 1994 წელს შეერთებული შტატების მიერ მიღებული ძალიან ცუდი იდეის შედეგია.
„ეს არის პროექტი, რომლის მიზანიცაა ნატოს განუსაზღვრელი გაფართოება ნებისმიერი მიმართულებით – სვლა აღმოსავლეთისკენ, შემდეგ კიდევ უფრო აღმოსავლეთით, ყოფილი საბჭოთა კავშირის მიმართულებით, ყოფილ საბჭოთა კავშირში, შავი ზღვის რეგიონში რუსეთის ალყაში მოქცევა და ბოლოს პატარა ქვეყნისკენ სამხრეთ კავკასიაში – საქართველოსკენ. კლინტონმა ხელი მოაწერა ამას 1994 წელს. ეს გახდა ის, რასაც ჩვენ ვუწოდებთ „დიფ სთეითის“ პროექტს, რაც იმას ნიშნავს, რომ მნიშვნელობა არ ჰქონდა, ვინ იქნებოდა პრეზიდენტი – თითოეული მათგანი მოვიდოდა და უბრალოდ ინფორმირებული იქნებოდა, რომ ნატო აგრძელებს აღმოსავლეთისკენ გაფართოებას და ისიც ამ პროცესის ნაწილი უნდა ყოფილიყო“, – აღნიშნა ამერიკელმა პროფესორმა.
„ასე რომ, კლინტონმა ეს პროცესი 1994 წელს დაიწყო, ხოლო როგორც პრემიერ-მინისტრმა ორბანმა თქვა, 1990 წლის 9 თებერვალს, აშშ-მა სრულიად მკაფიო და ერთმნიშვნელოვანი ფორმით განუცხადა პრეზიდენტ მიხეილ გორბაჩოვს, რომ ნატო ერთი სანტიმეტრითაც არ წაიწევდა აღმოსავლეთით. არ მგონია, რომ ჩვენს პრეზიდენტს, დონალდ ტრამპს, ძალიან მოეწონოს, რომ ჩინეთი და რუსეთი ცენტრალურ ამერიკაში სამხედრო ბაზებს აშენებდნენ. იცით, რუსებმა სწორედ ასე აღიქვეს ეს – „რატომ მოდიხართ ჩვენს საზღვართან, როცა გვითხარით, რომ არ გადმოიწევდით?“, – განაცხადა ჯეფრი საქსმა.
მან ასევე აღნიშნა, რომ „2008 წელს ჯორჯ ბუშმა, როგორც ამერიკელები ხშირად აკეთებენ, კიდევ უფრო გაამკაცრა პოზიცია და განაცხადა: „ახლა გადავინაცვლებთ უკრაინასა და საქართველოში“. სწორედ ამიტომ მოხდა ეს ომი“.
„ჩვენმა ახალმა სახელმწიფო მდივანმა, მარკო რუბიომ ფუნდამენტური სიმართლე თქვა – ჩვენ ვცხოვრობთ მრავალპოლარულ სამყაროში. რას ნიშნავს ეს? ამერიკული აზროვნება 30 წლის განმავლობაში ასეთი იყო – ჩვენ ვმართავთ შოუს. მარკო რუბიომ კი თქვა: „ჩვენ აღარ ვმართავთ შოუს. ჩვენ ვცხოვრობთ სხვა ძლიერ ქვეყნებთან ერთად“. ევროპა დაბნეულია, რადგან ევროპამ ხელი მოაწერა ამერიკის პროექტს. ყველა ეს პოლიტიკოსი ევროპაში ახლა არის იქ, სადაც არის, რადგან ისინი აშშ-ის პროექტის ნაწილი იყვნენ, მაგრამ ახლა აშშ თავის პროექტს აუქმებს“, – დასძინა მან.