ეს არ არის უწყინარი გართობა, ეს არის პირდაპირი ბოროტება, მჩხიბაობის ადგილად იქცა იქ, სადაც ლიტურგიას ატარებდნენ, 9 აპრილს და ხალხს აზიარებდნენ და ეს იყო სალოცველი ადგილი, – განაცხადა დეკანოზმა ალექსანდრე გალდავამ საპროტესტო აქციებზე შეკრებილთა ნაწილის ქმედებების შეფასებისას.
როგორც მან აღნიშნა, ის, რაც საპროტესტო აქციაზე ხდება არა პერფორმანსი, არამედ მჩხიბაობა და სატანისტური რიტუალებია.
„ეს არის საშინელება, ეს არ არის არანაირი პერფორმანსი, ეს არ არის არანაირი გართობა და ეს არ არის არანაირი თამაში, უწყინარი თამაში მითუმეტეს, ან ისეთი თამაში, სადაც ბავშვებიც მონაწილეობენ. ეს არის რიტუალური ქმედება და რიტუალური ბოროტება, ეს არის სატანისტური რიტუალი. შეგიძლიათ ამას რაღაცა სხვადასხვა შემფუთავი სახელები დაარქვათ, ძალიან მოსაწონი, პროგრესული და „ევროპული“, მაგრამ ამას აქვს ერთადერთი სახელი – ეს არის მდაბიო მჩხიბაობა და სატანისტური რიტუალი, რომელსაც რასაკვირველია მასში მონაწილე ადამიანებისთვის ექნება ძალიან მძიმე შედეგები. იმ სულიერი სამყაროდან, რომელშიც ისინი ესე შედიან, გამოსვლა ძალიან გაუჭირდებათ. ამის შემდეგ არის მსხვერპლშეწირვა, შეიძლება კატები შესწირონ მსხვერპლად და შემდეგ კიდევ უფრო უარესი გააკეთონ“, – განაცხადა დეკანოზმა ალექსანდრე გალდავამ.