“ეუთოს საპარლამენტო ასამბლეაზე საკმაოდ მწვავედ დავაყენეთ საქართველოს ტერიტორიების ოკუპაციის საკითხი”

ჩვენ საკმაოდ მწვავედ დავაყენეთ საქართველოს ტერიტორიების ოკუპაციის საკითხი და გავახსენეთ მთელ აუდიტორიას, საუბრის დროს აუცილებელია, ყველამ ახსენოს, რომ ქვეყნის ტერიტორიების 20% ოკუპირებულია, – განაცხადა პარლამენტის საგარეო საქმეთა კომიტეტის თავმჯდომარემ, ნიკოლოზ სამხარაძემ, რომელიც ვენაში, ეუთოს საპარლამენტო ასამბლეაზე იმყოფება.

ასამბლეა განიხილავს ევროპის უსაფრთხოებას და პოლიტიკურ საკითხებს, რომლებიც წევრ სახელმწიფოებშია.

ნიკოლოზ სამხარაძის თქმით, ხვალ ეუთოს საპარლამენტო ასამბლეის ანგარიშში შეტანილია იქნება საქართველოს ტერიტორიების ოკუპაციის საკითხი.

„სამწუხაროდ, ამ ანგარიშის შემდგენელს არ ჰქონდა წარმოდგენილი საქართველოს ტერიტორიების ოკუპაცია და ჩვენ საკმაოდ მწვავედ დავაყენეთ ეს საკითხი და გავახსენეთ მას და ასევე მთელს აუდიტორიას, რომ საქართველოზე საუბრის დროს აუცილებელია, ყველამ ახსენოს ის, რომ ქვეყნის ტერიტორიების 20% არის ოკუპირებული და ასევე, საქართველოს მოსახლეობის, დაახლოებით 8%, ანუ 300 ათასი ადამიანი არის საკუთარი სახლებიდან დევნილი. მივიღე პირობა, რომ ეს საკითხი მკაფიოდ იქნება ასახული შემდგომ ანგარიშში.

დღეს ჩვენ ასევე შეხვედრა გვექნება ეუთოს ახლად არჩეულ გენერალურ მდივანთან. ვისაუბრებთ არა მხოლოდ კონფლიქტის საკითხებზე, არამედ – ქვეყანაში არსებულ ვითარებაზე, მათ შორის საპარლამენტო არჩევნების შემდგომ მოვლენებზე და ასევე იმ პროცესზე, რომელიც დაგეგმილი გვაქვს პარლამენტში.

მოგეხსენებათ, ეუთოს საპარლამენტო ასამბლეა მთავარი დამკვირვებელი ორგანიზაციაა არჩევნების და ჩვენ ასევე გვექნება არჩევნების განხილვა. ჩვენი არგუმენტი პირველ რიგში, არის თვითონ ეუთოს დასკვნა, რომელშიც ეწერა, რომ არჩევნები იყო კონკურენტული; რომელშიც ეწერა, რომ პოლიტიკურ პარტიებს ჰქონდათ თავისუფალი წვდომა მედიაზე, მიუხედავად იმისა, რომ მედია პოლარიზებულია, მაგრამ წვდომა ყველას ჰქონდა.

საუბარი იყო იმაზე, რომ ამომრჩევლებს შეეძლოთ, თავისუფლად აერჩიათ ის პოლიტიკური პარტია, რომელიც მათ სურდათ, რომ მოსულიყო ხელისუფლებაში – არჩევანი იყო საკმაოდ დიდი. რაც მთავარია, ვერავინ ნახა ვერანაირი ფაქტი იმისა, რომ არჩევნები იყო გაყალბებული და მათ შორის, დადასტურდა სისწორე ელექტრონული მთვლელი მანქანებისა, რომელიც ამ არჩევნებში პირველად იყო წარმოდგენილი“, – განაცხადა სამხარაძემ.