ბათუმში გაწმენდით სამუშაოებში 70-ზე მეტი ტექნიკა და ტექნიკური საშუალება, ასევე 700-ზე მეტი მუნიციპალიტეტის თანამშრომელია ჩართული, – განაცხადა ბათუმის მერმა „დღის ქრონიკაში“ ჩართვისას.
არჩილ ჩიქოვანის თქმით, ბოლო 5 დღეა როგორც ბათუმში, ასევე აჭარის ყველა მუნიციპალიტეტში მძიმე კლიმატური პირობებია, რის გამოც ინტენსიურად თოვს.
„პრაქტიკულად ბოლო 24 საათის განმავლობაში, ინტენსიურმა თოვამ როგორც ბათუმში, ასევე მაღალმთიან მუნიციპალიტეტში საკმაოდ მაღალი თოვლის საფარი გამოიწვია, რაც საავტომობილო მიმოსვლისთვის პრობლემებს ქმნის.
ბათუმში 70-ზე მეტი ტექნიკა და ტექნიკური საშუალება, ასევე 700-ზე მეტი მუნიციპალიტეტის თანამშრომელია ჩართული გაწმენდით სამუშაოებში. დიდთოვლობის შედეგად 80-მდე ხე-მცენარე დაზიანდა. გვქონდა რამდენიმე შემთხვევა, როდესაც მრავალბინიანი საცხოვრებელი სახლების სახურავები დაზიანდა. რამდენიმე მისამართზე ასევე აივნის დაზიანების შესახებ შეტყობინებაც იყო.
24-საათიან რეჟიმში მუშაობს როგორც ტექნიკა, ასევე სამსახურები და საგანგებო რეჟიმში განვაგრძობთ მუშაობას. როგორც ბათუმში, ასევე მაღალმთიან მუნიციპალიტეტში შეფერებები იყო ენერგორესურსების მიწოდების კუთხით. გუშინდელი დღიდან პრაქტიკულად ბათუმის ყველა აბონენტს მიეწოდება გაზი. ელექტროენერგიის ნაწილში მცირე ტიპის ხარვეზები არის, მაგრამ „ენერგო პრო ჯორჯიას“ ჯგუფები მუშაობენ ბათუმში, ასევე სხვა მუნიციპალიტეტებისთვის, რათა სწრაფად მოხდეს აღდგენითი სამუშაოები. რამდენიმე დღის წინ წყლის მიწოდებაში გვქონდა გამოწვევა – ბათუმში 18 ათას აბონემენტს არ მიეწოდებოდა, თუმცა გუშინ მაგისტრალურ წყალსადენზე დაზიანება აღმოიფხვრა და დღეს ყველა აბონემენტს წყალი მიეწოდება“, – განაცხადა ჩიქოვანმა.
მისივე თქმით, დილიდან რთული ხილვადობისა და ნისლის გამო, სატრანსპორტო ავტოპარკის 50% მუშაობდა. ჩიქოვანის განმარტებით, მუნიციპალური ტრანსპორტის მოძრაობის სრულად აღდგენა ამინდის პირობების გაუმჯობესებაზე იქნება დამოკიდებული.