შინაგან საქმეთა სამინისტროს ყველა შესაბამისი დანაყოფი დიდთოვლობასთან დაკავშირებით საგანგებო რეჟიმში მუშაობას განაგრძობს. სამაშველო სამუშაოებში ჩართულია საგანგებო სიტუაციების მართვის სამსახურის 600-მდე მეხანძრე-მაშველი.
მეხანძრე-მაშველები ათეულობით ადამიანს დაეხმარნენ და უსაფრთხო ადგილას გადაიყვანეს, მათ შორის არიან მოხუცები, მცირეწლოვნები და განსაკუთრებული საჭიროების მქონე პირები.
საგანგებო რეჟიმში მუშაობას განაგრძობენ საპატრულო პოლიციისა და კრიმინალური პოლიციის თანამშრომლები, რომლებიც მობილიზებული არიან, როგორც ცენტრალურ მაგისტრალებზე, ასევე, შიდა სახელმწიფოებრივ გზებზე.
გურიის რეგიონში სტიქიის სალიკვიდაციო სამუშაოებში ჩართულია თავდაცვის ძალების ლოგისტიკის სარდლობის შესაბამისი ტექნიკა, კერძოდ, მუხლუხოებიანი და სპეციალური საინჟინრო ტექნიკა. თავდაცვის სამინისტროს ინფორმაციით, დამატებითი ტექნიკის ტრანსპორტირება ამ დრომდე გრძელდება.