სტიქიისგან დაზღვეული არავინ არის, მთავარია შემდეგ როგორ რეაგირებ. კოორდინირებული მუშაობა გაგრძელდება და მთავარი საკითხია, რომ არც ერთი მოქალაქე უყურადღებოდ არ დარჩეს, – განაცხადა ქობულეთში მყოფმა საქართველოს პრეზიდენტმა მიხეილ ყაველაშვილმა.
მისი თქმით, აჭარაში სიტუაცია მართვადია და სამხედრო ძალების დახმარებას რეგიონი არ საჭიროებს.
„აჭარაში სიტუაცია ბევრად უკეთესია, ამინდმაც შეუწყო ხელი და დარწმუნებული ვარ, რომ რამდენიმე დღეში ყველაფერი თითქმის 100 პროცენტით აღდგება. დარჩა რამდენიმე ლოკაცია, სადაც მიმდინარეობს გზების გაწმენდა. ასევე, ელექტროენერგიის მხრივ თითქმის 80-90% აღდგენილია ქობულეთის რაიონში. დარჩენილია ასევე, რამდენიმე ლოკაცია, სადაც საჭიროებს ელექტროენერგიას.
სტიქიისგან დაზღვეული არავინ არის. მთავარია შემდეგ როგორ რეაგირებ და ამას აქვს ძალიან დიდი მნიშვნელობა. აჭარაში კოორდინაციის თემა არის ძალიან მაღალ დონეზე. ასევე, მინდა გამოვყო უწყებები, ინფრასტრუქტურის სამინისტრო, ჩემთან ერთად ბრძანდებოდა პრემიერ-მინისტრი, ინფრასტრუქტურის მინისტრი, თავდაცვის მინისტრი და შინაგან საქმეთა მინისტრი. ვსარგებლობ შემთხვევით და დიდ მადლობას მოვახსენებ ჩვენს მაშველებს, ასევე, თავდაცვის ძალების სამხედროებს, რომლებიც დღესაც 24-საათიან რეჟიმში მუშაობენ. აჭარა არ საჭიროებს მათ დახმარებას, მაგრამ გურიაში და იმერეთში ალბათ იქნება საჭიროება.
კოორდინირებული მუშაობა გაგრძელდება და მთავარი საკითხია, რომ არც ერთი მოქალაქე უყურადღებოდ არ დარჩეს. აჭარაში ეს მაღალ დონეზე არის. მუშაობს „ცხელი ხაზი“. ყველასთან მყარდება კომუნიკაცია“, – განაცხადა მიხეილ ყაველაშვილმა.
მისი თქმით, მავნებლური დეზინფორმაციული კამპანიებით ოპოზიცია ცდილობს შეიყვანოს შეცდომაში მოსახლეობა, თითქოს არაფერი კეთდება, რაც სიცრუეა.
„როცა სტიქია მძვინვარებს ქვეყანაში, ეს დაახლოებით ანალოგიურია, როცა ომია და ასეთ შემთხვევაში არსებობენ ადამიანები, რომლებიც ავრცელებენ დეზინფორმაციას ასეთ სიტუაციაში.
როცა ადამიანები, მითუმეტეს პოლიტიკოსი რომ ჰქვია და ჩემი წინამორბედი, რომელიც გამოდის და ჯერ ახალი დაწყებული სტიქიიდან იძახის, რომ ჩვენ ხელისუფლება არ გვყავს, პირდაპირ ზიანს აყენებს ქვეყანას, ეს არის მიუღებელი“, – განაცხადა მიხეილ ყაველაშვილმა.
პრეზიდენტი მოუწოდებს მოქალაქეებს, ნუ ენდობიან ოპოზიციის მიერ გავრცელებულ ცრუ ინფორმაციას და იცოდნენ, რომ ყურადღების გარეშე ხელისუფლება არავის დატოვებს.