დღეს პირველი დღეა, რაც თოვამ გადაიღო და ვითარება იმერეთში შედარებით სტაბილურ მდგომარეობაში გადადის, – განაცხადა „დღის ქრონიკაში“ ჯანმრთელობის დაცვისა და სოციალურ საკითხთა კომიტეტის თავმჯდომარემ ზაზა ლომინაძემ, რომელიც ქუთაისში იმყოფება.
„ამჟამად შეიძლება ითქვას, რომ ვითარება შედარებით სტაბილურ მდგომარეობაში გადადის. დღეს გადაიღო თოვამ, პირველი დღეა. ტემპერატურა 3-4-5 გრადუსის ფარგლებშია, თუმცა ღამე მოსალოდნელია ყინვები. იმერეთის რეგიონში 11 მუნიციპალიტეტიდან ხუთში ჯერ კიდევ არის ცოტა რთული ვითარება – ეს არის სამტრედიის, ვანის, ბაღდათის, ხარაგაულის და ზესტაფონის რაიონები. სხვა რაიონებში შედარებით სტაბილური ვითარებაა, ისევე როგორც ქუთაისში. ქუთაისის რელიეფიდან გამომდინარე არის ადგილები – საფიჩხია, გორა და სხვა მაღალმთიანი ადგილები, სადაც ცოტა გაძნელებული იყო მიმოსვლა, თუმცა დღეს უკვე პრაქტიკულად ყველა ცენტრალური გზა გაწმენდილია და მოსახლეობას მიეწოდება ყველა აუცილებელი საშუალება – ელექტროენერგიად გაზი და ა.შ.”, – განაცხადა ლომინაძემ.
ლომინაძის თქმით, იმერეთის ხუთ რაიონში ჯერჯერობით არის შეფერხებები დენის მიწოდებასთან დაკავშირებით. მისი თქმით, ქუთაისში პრემიერ-მინისტრ ირაკლი კობახიძესთან, პრეზიდენტ მიხეილ ყაველაშვილთან და მინისტრებთან ერთად ჩატარდა მთავრობის სხდომა. ლომინაძემ ასევე აღნიშნა, რომ საპარლამენტო გუნდი ბ-ნი მამუკა მდინარაძის ხელმძღვანელობით გუბერნატორთან ერთად ორი დღის განმავლობაში ქალაქში ხელმძღვანელობდა შტაბს, სადაც განხილული იყო არსებული გამოწვევები.
„შემიძლია გითხრათ, რომ უკვე ბევრი ის გამოწვევა, რაც იყო, უმეტესობა მოგვარებულია. რჩება კიდევ რამდენიმე სოფელი, სადაც მისასვლელი გზა პრაქტიკულად ჯერ არ არის იმიტომ, რომ თოვლის საფარი ორ მეტრს სცდება. ხელისუფლება ადგილობრივ მუნიციპალიტეტთან ერთად მაქსიმალურად ჩართულია, რათა აღდგეს ელექტროენერგიის მიწოდება. გაზის მიწოდება პრაქტიკულად ყველა რაიონში შეუფერხებლად გრძელდება. დარჩენილია სულ რამდენიმე სოფელი“, – განაცხადა ლომინაძემ.
ლომინაძის თქმით, რამდენიმე რაიონში პაციენტებს სჭირდებოდათ გეგმური ჰემოდიალიზის პროცედურები. კერძოდ, იყო შეფერხება მათ შესაბამის ცენტრებში გადაყვანასთან დაკავშირებით, თუმცა ჯანდაცვის სამინისტროსა და პირადად მიხეილ სარჯველაძის ჩართულობით ეს პრობლემაც მოგვარდა. პაციენტები დროულად გადაიყვანეს დიალიზის პუნქტებში და მათ ჩაუტარდათ საჭირო პროცედურები.
„ასეთი გამოწვევები, როგორც იცით, სტიქიის დროს არსებობს. მედიკამენტების მიწოდება სრულად არის აღდგენილი. რაც შეეხება პროდუქტებს, მუნიციპალიტეტები და რაიონის ხელმძღვანელობა სრულად უზრუნველყოფს ამით, თუმცა ალბათ კიდევ რამდენიმე გამოწვევა არის. ვიცით, რომ ორი ადამიანი არის ფერმაში, ხარაგაულის მაღალმთიან სოფელში. მათთან კონტაქტი ვერ მყარდება. დღეს სამთავრობო სხდომაზე გადაწყდა, რომ დრონებით მოხდება მათი ვიზუალიზაცია და დამყარდება კავშირი იმ ორ ადამიანთან“, – აღნიშნა ლომინაძემ.
ლომინაძემ ასევე აღნიშნა, რომ ხდება ნებისმიერი ინფორმაციის მიზნობრივად ჩაშლა, რომელიც ცხელ ხაზზე და შტაბში შემოდის. ყველა უწყება ხაზზეა, რათა გამოწვევები დროულად მოგვარდეს.
„მოგეხსენებათ, ასეთ დაბალ ტემპერატურებს იმერეთი არ არის შეჩვეული, ამიტომ, რა თქმა უნდა, მოსახლეობასაც მოვუწოდებ, რომ მაქსიმალურად თავის შეიკავონ გადაადგილებისგან თუ არ არის ამის საჭიროება მითუმეტეს ღამის საათებში, როდესაც საკმაოდ დაბალი ტემპერატურა იქნება, ხოლო დღისით იცით, რომ დაიწყება თოვლის დნობის პროცესი, ამიტომ შეიძლება წყალი ჭარბი რაოდენობით იყოს, რაც მაქსიმალურად თავშეკავებას ითხოვს ჩვენი მოსახლეობისაგან. ამ დღეებსაც გადავიტანთ. ორშაბათიდან უკვე საკმაოდ თბილი ტემპერატურებია დღის საათებში და ღამე ყინვა აღარ იქნება. ამასაც გადავლახავთ აუცილებლად. გამოწვევაა, სტიქიაა და არა ერთხელ დაგვიძლევია ჩვენ ერთობით და დარწმუნებული ვარ, რომ ამ სტიქიასაც დავძლევთ“, – განაცხადა ლომინაძემ.